Trashëgimia arkeologjike, në konferencën për projektin Adriatiko-Jonian “Transfer 1071”

 Konferenca finale për projektin Adriatiko-Jonian “Transfer 1071” u mbajt në Beograd në Muzeun Kombëtar. Akademia e Studimeve Albanologjike (ASA) dhe Instituti i Arkeologjisë (IA), në cilësinë e partnerit të projektit, u përfaqësuan nga dr. Melsi Labi, kërkues shkencor pranë ASA-s, dhe koordinator në këtë projekt. Në “Transfer 1071 - Modele të Integruara të Menaxhimit të Parqeve Arkeologjike”, i bashkëfinancuar nga programi transnacional evropian ADRION (Interreg V-B Programi Adriatik-Jonian), janë përfshirë 12 organizata partnere nga Italia, Shqipëria, Sllovenia, Kroacia, Greqia dhe Serbia, nën drejtimin e Universitetit të Maceratas (Itali). ASA shprehet se konferenca e Beogradit më 24 janar paraqiti rezultatet, përvojat dhe mjetet strategjike që janë krijuar gjatë zbatimit të projektit. “Qëllimi ka qenë të zhvillohet një model i përbashkët qeverisjeje për parqet arkeologjike për të përmirësuar ruajtjen dhe vlerësimin e trashëgimisë arkeologjike brenda zonës së Adrionit. Si raste studimore për zbatimin dhe testimin e modelit janë marrë parqet: Urbs Salvia (Itali), Antigonea (Shqipëri), Ptuj (Slloveni), Dodona (Greqi), Omišalj dhe Shibenik (Kroaci)”, thuhet nga ASA. Dr. Melsi Labi prezantoi punën që ka bërë Instituti i Arkeologjisë (ASA), kolegët kontribuues në këtë projekt, Prof. dr. Luan Perzhita, Prof. asoc. dr Belisa Muka, Dr. Sabina Veseli e Ma. Vasenka Paço, për ngritjen dhe përpunimin shkencor të një modeli menaxhimi të qëndrueshëm dhe bashkëkohor të parqeve arkeologjike dhe muzeve të hapur në Shqipëri. Gjatë kësaj kohe Instituti i Arkeologjisë ka shkëmbyer përvoja me një sërë institucionesh evropiane të kërkimit shkencor. Ky projekt i financuar nga BE në vlerën 1.6 ml. euro dhe finalizimi i tij me sukses është fryt i një pune gati 3-vjeçare. Sipas ASA-s në konferencën e Beogradit u prezantuan raste studimore për një menaxhim të qëndrueshëm të parqeve arkeologjike në kushtet e sotme ekonomike dhe për përdorimin e metodave të reja teknologjike në këtë drejtim.