Trashëgimia kulturore, “EU4Culture” 590 mijë dollarë për 11 organizata të shoqërisë

Programi “EU4Culture” do të mbështesë 11 organizata të shoqërisë civile shqiptare. Në ambientet e Muzeut Arkeologjik Durrës u shpallën fituesit, për thirrjen e parë publike në programin e financuar nga Bashkimi Evropian “Rigjallërimi i trashëgimisë kulturore të Shqipërisë në përgjigje të tërmetit të Shqipërisë 2019, 2020-2024”.  Me grante që variojnë nga 42,000 deri në 60,000 dollarë, projektet që do të zbatohen do të krijojnë vende të reja pune për komunitetet lokale dhe do të nxisin zhvillimin e artizanatit, turizmit inovativ, platformave digjitale dhe eventeve kulturore në bashkitë e Durrësit, Kavajës, Rrogozhinës dhe Krujës. Shefi i Bashkëpunimit të Delegacionit të BE-së në Shqipëri Hubert Perr tha se ky program do të fokusohet në krijimin e partneriteteve ndërmjet organizatave të shoqërisë civile, bizneseve dhe bashkive. “Për të përfituar nga historia dhe trashëgimia kulturore dhe për t'i përdorur ato si një mjet për të nxitur zhvillimin socio-ekonomik dhe lokal”,  u shpreh ai. Ministrja e Kulturës Elva Margariti tha se ishin 58 aplikime. “Kjo thirrje vë në dispozicion 590 mijë dollarë për 11 projektet fituese”, pohon Margariti. Fituesit e granteve janë: 1. Cultural Heritage without Borders Albania - në mbështetje të projektit “Platformat e fuqizimit dhe mësimit të trashëgimisë”; 2. Help - Hilfe zur Selbsthilfe e.V. BH për “Ringjallja e zejeve tradicionale lokale në Kavajë”; 3. Udhëtimi Lirë - në projektin “Zhvillimi i trashëgimisë së Durrësit bazuar në kulturën kreative”; 4. TID Kruja - në mbështetje të projektit “Dhe tradita vazhdon në Krujë”; 5. Fondacioni PROGRESS - në mbështetje të projektit “Artizanët mes së shkuarës dhe së ardhmes”; 6. Joscelyn Foundation -për projektin “Rivendosja e traditës artizanale”; 7. Auleda, Local Economic Development Agency, Vlorë - në mbështetje të projektit “Routes4culture”; 8. Urban Research Institute - në mbështetje të “Artizanët për Trashëgiminë Kulturore -ArtCult”. Në vijim të listës së publikuar,  9 është Durrësi Aktiv për projektit “Kur e kaluara takohet me të ardhmen- rivitalizimi i trashëgimisë kulturore”; 10. Qendra ESN AL - te projekti “TourAZZO - Promovimi dhe valorizimi i trashëgimisë kulturore si nxitës i turizmit dhe zhvillimit social-ekonomik në Durrës” dhe 11 Instituti i Politikave Publike dhe Private - në mbështetje të projektit “3E “Eksploro - Përjeto- Përmirëso Turizmin Kulturor në zonën e pas tërmetit”.

"RetroFest" për promovimin e trashëgimisë sonë kulturore

Një sfilatë makinash historike çelën "RetroFest", turin veror Durrës-Apoloni-Fier-Prizren me parkun kombëtar arkeologjik të Apolonisë.  Ministrja e Kulturës Elva Margariti bën me dije se është një bashkëpunim me Drejtorinë e Përgjithshme të Shërbimeve të Transportit Rrugor për promovimin e trashëgimisë kulturore. “Makinat historike takojnë trashëgiminë kulturore! Nga Durrësi, vargu i makinave retro po drejtohet për në Fier. Ndalesa e parë në parkun kombëtar arkeologjik të Apolonisë më pas në qendrën e qytetit të Fierit!”, shkruante më parë ministrja Margariti në një status të saj Facebook. Apolonia në Fier është një nga sitet më të mëdhenj të Shqipërisë, por edhe një nga qytetet më të mëdhenj në botën antike.