“Trimat e Jutbinës”, një shfaqje me motive popullore të baladave, të eposit të kreshnikëve dhe kohës së luftës

Shfaqja “Trimat e Jutbinës” me muzika origjinale dhe regji nga Gerti Druga erdhi në skenë me artistët e Ansamblit Popullor. Një shfaqje e konceptuar mbi legjendat shqiptare të marra nga vëllimi “Tregime të moçme shqiptare” nga Mitrush Kuteli, e cila sipas Teatrit Kombëtar të Operës, Baletit dhe Ansamblit Popullor u mirëprit nga publiku. Shfaqja ishte dy net në skenën teatrore dhe TKOBAP publikoi më parë dhe një album fotosh. “Fotoalbumi i natës së parë të shfaqjes “Trimat e Jutbinës”. Një shfaqje e zjarrtë me motive popullore të baladave, të eposit të kreshnikëve dhe kohës së luftës të gjata shqiptaro-osmane”, thuhet nga TKOBAP, që shprehet se pati një energji të jashtëzakonshme që rrëmbeu duartrokitjet e publikut. Programi i shfaqjes që erdhi dy net në skenën e Teatrit Kombëtar të Operës, Baletit dhe Ansamblit Popullor  bazohet në 11 rrëfimet e vëllimit “Tregime të moçme shqiptare”, konceptuar në 11 momente të ndryshme, ku ndërthuren muzika, vallet, ritet. Vetë regjisori Druga shprehet me vlerësime pirr artistët e ansamblit. “I përulur dhe falenderues. Për trupën më të mrekullueshme me të cilën kemi luajtur edhe në të ftohtë, edhe në shi, edhe në mes të diellit ashtu si edhe në skenat më prestigjioze. S'më kanë thënë kurrë jo, sado të çmendura ishin idetë e mija, i kisha gjithmonë me vete, si një familje e madhe”, shkruan ai në Facebook ndër të tjera. Emrin e skenarit e mban Petrit Ruka, projeksion Genci Osmani, ilustrimet Gazmend Leka. Koreografia Rexhep Çeliku, Genc Kastrati, Jera Çurçia. Interpretuan grupi vokal dhe trupa e valleve e Ansamblit Popullor. Muji- Gëzim Halili; Zanat- Jera Çurçia, Olta Ahmetaj; Orët- Helga Saraçi. Trimi i parë Enkelejd Bajraktari, tridhjetë agallarët e Jutbinës trupa e valleve. Ajkuna- Hatixhe Lushi.