Veprat e fëmijëve ukrainas që po kalojnë luftën në GAT

Ekspozita e veprave artistike të fëmijëve nga Ukraina u çel në Galerinë e Artit Tiranë. Ekspozita, që prezanton veprat e fëmijëve ukrainas që po kalojnë luftën përcjell mesazhet e tyre. Në materialin e ekspozitës nga GAT thuhet se punimet janë bërë nga fëmijë nga pjesë të ndryshme të Ukrainës, të cilët kanë më shumë se një vit që jetojnë nën bombardimet.  “Këta janë fëmijë që i mbijetuan një dimri të vështirë me ndërprerje të vazhdueshme të energjisë dhe ujit. Fëmijët që bëjnë detyrat e shtëpisë dhe lexojnë libra nën tingujt e sirenave. Fëmijë që, pavarësisht gjithçkaje, merren me muzikë, art, sport, zhvillojnë aftësitë e tyre dhe përgatiten për jetën në një Ukrainë paqësore”, thuhet në materialin e ekspozitës, që u hap këto ditë në Galerinë e Artit Tiranë. Në hapje të ekspozitës ishte i pranishëm drejtori i GAT dr. Abaz Hado, ambasadori i Ukrainës në vendin tonë Volodymyr Shkurov, etj. Pikturat tregojnë luftën përmes syve të fëmijëve, dhimbjen dhe tmerrin e tyre, si dhe shpresën e pakufishme për një të ardhme të ndritshme dhe besimin e palëkundur në fitoren e dritës mbi errësirën. Në punën e fëmijëve, vihet re se, pavarësisht sprovave të vështira të luftës, artistët e rinj ruajnë në zemrat e tyre ndjenjën e bukurisë së botës. Projekti organizohet nga Shoqata për Zhvillimin e Marrëdhënieve Ndërkombëtare ADRUM, kompania e promovimit dhe prodhimit Studiorar  nën patronazhin e Ministrisë së Kulturës dhe Politikës së Informacionit të Ukrainës dhe Ambasadës së Ukrainës në Shqipëri. Ekspozita që u hap këto ditë në Galerinë e Artit Tiranë (GAT) do të qëndrojë deri në datën 15 qershor për publikun. Galeria e Artit të Tiranës, është një institucion në vartësi të Bashkisë Tiranë. Ekspozita që u hap me veprat artistike të fëmijëve nga Ukraina vjen në vijim dhe të tjera veprimtarive, që janë zhvilluar më parë nga ky institucion me fëmijët.