Veprimtaria “Një komb-Një gjuhë letrare” me rastin e 50-vjetorit të Kongresit të Drejtshkrimit

Me rastin e 50-vjetorit të Kongresit të Drejtshkrimit janë zhvilluar aktivitete të ndryshme. Pak ditë më parë ishte veprimtaria shkencore dhe jubilare “Një komb-Një gjuhë letrare”. Shoqata e Artistëve dhe Intelektualëve “Art Club” e Ulqinit në bashkëpunim me Akademinë e Shkencave të Shqipërisë organizoi më 3 dhjetor këtë veprimtari në Galerinë e Kulturës, Ulqin. Morën pjesë përfaqësues të Ambasadës së Republikës së Kosovës në Malin e Zi, studiues e dashamirë të gjuhës shqipe, shkrimtarë, mësues, profesorë, doktorantë dhe veteranë të arsimit nga qyteti i Ulqinit e rrethinat e tij, dhe nga krahina e Tuzit. Përshëndeti në emër të kryesisë së Akademisë së Shkencave prof.dr. Gëzim Hoxha, kryetar i Seksionit të Shkencave Shoqërorë dhe Albanologjike dhe mbajti kumtesën “Shqiptarët në Malin e Zi dhe drejtshkrimi i gjuhës shqipe”. Ai tha ndër të tjera se shqiptarët ne Malin e Zi janë pjesë shumë aktive e arritjeve të sotme për gjuhën e njësuar shqipe. “Për këta kontribute do të mund të flitej shumë gjatë për shumë kontribute e botime të autorëve shqiptarë të Malit të Zi. Por unë po zgjedh një rrugë disi sintetike, duke u përqendruar në tri figura, të cilat simbolizojnë përpjekjet dhe rezultatet e arritura nga shqiptarët e Malit të Zi, për lëvrimin e gjuhës shqipe dhe zhvillimin e kulturës shqiptare në tërësi”, tha prof.dr. Hoxha. Akad. Shaban Sinani tha se 50-vjetori i Kongresit të Drejtshkrimit shërbeu si një rast për të vlerësuar e për të reflektuar. Akad. emeritus Gjovalin Shkurtaj tha se përkujtimi dhe vlerësimet për 50-vjetorin e Drejtshkrimit të Gjuhës Shqipe (1972-2022), duhet të na shërbejë si një kthjellim e zotim për ta shtuar kujdesin për shqipen. Referuesit sollën përvoja të pasura në përdorimin e gjuhës së njësuar me rol ndikues në zhvillimin e letërsisë shqipe dhe rolin e pamohueshëm përbashkues të shqipes, edhe kur kufijtë ishin të mbyllur.