Viti 2021, 512 shfaqje dhe premiera në institucione ndjekur nga 38.091 spektatorë

Gjatë vitit 2021, janë organizuar gjithsej 512 shfaqje dhe premiera në institucionet qëndrore të artit. Sipas të dhënave nga INSTAT, krahasuar me vitin e kaluar ky tregues ka pësuar rritje. “Në institucionet qëndrore të artit, gjatë vitit 2021, morën pjesë në aktivitetet kulturore 38.091 spektatorë”, thuhet nga INSTAT. Sa i takon pjesëmarrjes në kulturës, sipas INSTAT ky seksion paraqet të dhëna nga Ministria e Kulturës lidhur me numrin e aktiviteteve të organizuara në institucionet qëndrore të artit, si dhe pjesëmarrjen për secilin institucion. Në institucionet qëndrore të artit gjatë vitit 2021, morën pjesë në aktivitetet kulturore 38,091 spektatorë, por sipas INSTAT në 2020 ky numër ka qenë 38.332 spektatorë. Në 2021 Teatri Kombëtar ka pasur 57 shfaqje/ premiera, që janë ndjekur nga 6.446 spektatorë. Teatri Kombëtar Eksperimental në 2021 ka pasur në skenë 159 shfaqje/premiera, që janë ndjekur nga 11.981 spektatorë. Referuar të dhënave të publikuar nga INSTAT, Teatri Kombëtar i Operës, Baletit dhe Ansamblit Popullor në 2021 ka pasur 99 shfaqje/premiera, me një numër spektatorësh 7.151. Qendra Kombëtare e Kulturës për Fëmijë në vitin 2021 ka qenë me 146 shfaqje/premiera, ndjekur nga 10.149 spektatorë. Cirku Kombëtar për 2021 sipas INSTAT ka realizuar 51 shfaqje/premiera, ndjekur nga 2.364 spektatorë. Më shumë shfaqje referuar të dhënave të INSTAT për vitin 2021 ka realizuar Teatri Kombëtar Eksperimental “Kujtim Spahivogli”, i cili gjithashtu ka më shumë shfaqje/premiera në vitin 2021 se sa në 2020. Në vitin 2020 ka pasur 135, ndërsa në 2021 janë 159 shfaqje/premiera. Teatri Kombëtar në 2020 kishte 63 shfaqje/premiera, ndërsa Teatri Kombëtar i Operës, Baletit dhe Ansamblit Popullor (TKOBAP) në 2020 ka pasur 45 shfaqje/premiera.