Yjet e muzikës botërore në skenën e Tiranës, Enrique Iglesias më 30 qershor dhe Ricky Martin më 20 korrik do të performojnë për publikun

Yjet e muzikës botërore do të këndojnë në Tiranë. Këngëtarët Enrique Iglesias dhe Ricky Martin do të zhvillojnë koncertet e tyre në sheshin “Skënderbej” për publikun gjatë muajve të verës. Këngëtarët e njohur tashmë kanë konfirmuar ardhjen e tyre në Shqipëri, ku Enrique Iglesias këndon më 30 qershor dhe Ricky Martin më 20 korrik në Tiranë. Për yjet e muzikës botërore Enrique Iglesias dhe Ricky Martin, që do të jenë në skenën e Tiranës kanë shkruar në rrjetet sociale dhe kryeministri Edi Rama dhe kryetari i bashkisë së Tiranës Erion Veliaj. Ministrja e Kulturës Elva Margariti gjithashtu shprehet në rrjete sociale për yjet e muzikës botërore, që do të jenë për herë të parë në vendin tonë. Margariti thotë se Iglesias vjen në Javën e Kulturës Spanjolle. “Tirana tanimë është stacioni i yjeve! Në 30 qershor, Enrique Iglesias vjen në Javën e Kulturës Spanjolle në Sheshin Skënderbej”, shkruan ministrja e Kulturës në rrjete sociale, që ka ndarë dhe foto të këngëtarit spanjoll. Ylli spanjoll i muzikës latine këngëtari Enrique Iglesias, që do të performojë në sheshin “Skënderbej” më 30 qershor është shpallur artisti më i mirë latin i të gjitha kohërave, sipas Billboard Latin Music Awards 2020. Në këtë mënyrë u nderua karriera e tij e mbushur me suksese në skenën muzikore, përfshirë këtu faktin se i ka shitur më shumë se 180 milionë albume.

Pas Iglesias në skenë do të jetë Ricky Martin

 Pas këngëtarit Enrique Iglesias, Ricky Martin vjen në Tiranë në kuadër të turit të tij muzikor. Ministrja e Kulturës Elva Margariti shprehet në rrjete sociale se është një datë për t’u shënuar koncerti i Ricky Martin. “Asnjëherë më parë nuk ka pasur kaq shumë ngjarje të mëdha kulturore në kryeqytetin shqiptar! Një tjetër yll do të zbresë në sheshin “Skënderbej”! Shënoni datën! Në 20 korrik, Ricky Martin vjen në Tiranë, si stacionin e radhës së turit të tij të koncerteve “RICKY MARTIN SYMPHONIC””, shprehet ministrja Elva Margariti në postimin e saj në Facebook. Artistët latin duket se do të bëjnë namin me koncertet e tyre në vendin tonë, ku do të performojnë për publikun gjatë muajve të verës. Por këngëtari i muzikës latine Ricky Martin ka reaguar për këtë moment të veçantë në rrjete sociale. Ai ndau vetë lajmin për ardhjen në Tiranë në rrjetin e tij social Instagram. “Po! Shumë i lumtur të njoftoj se do të jem në Tiranë, Shqipëri më 20 korrik me koncertin tim Simfonik dhe Orkestrën Kombëtare të Tiranës. Shpresoj se të gjithë mund të më bashkoheni në koncertin tim të parë në Shqipëri. Biletat në shitje në 8 qershor 13:00”, shkruan Martin. Ricky Martin, është këngëtar shumë i famshëm nga Porto Riko, i cili ka fituar çmim Grammy Award dhe Latin Grammy Award. Ai ka qenë në maja të klasifikimeve muzikore në USA, në Amerikën Latine, Evropë, etj. Koncertet e Enrique Iglesias dhe Ricky Martin do ti lënë radhën një tjetri artisti të njohur. Në datën 7 shtator pritet që të jetë në skenën e Tiranës dhe legjenda e muzikës operistike Placido Domingo.