Yzeir Llanaj: Festivali “Bylispolifonia” ka për qëllim ruajtjen dhe transmetimin e vlerave të polifonisë tek e ardhmja

Festivali ndërkombëtar i polifonisë “Bylispolifonia” këtë vit do të ketë në skenë mbi 35 grupe në konkurrim. Festivali këtë vit do të shënojë edicionin e 11-të në datat 22-23 shtator. Në dy ditë në Bylis do shpalosen gjetjet më të bukura të polifonisë nga grupet polifonike më në zë të vendit, por dhe nga shtete të tjera. Mjeshtri i polifonisë Yzeir Llanaj shprehet se veç grupeve pjesëmarrëse në festival janë të ftuar dhe historianë, etj. “Festivali ndërkombëtar i polifonisë “Bylispolifonia” zhvillohet një herë në dy vjet. Festivali i fundit është i vitit 2021 pas pandemisë. Këtë vit në datat 22-23 shtator organizohet edicioni i 11-të. Organizimi i këtij festivali ka për qëllim ruajtjen dhe përhapjen e vlerave të polifonisë. Marrin pjesë në konkurrim në këtë festival mbi 35 grupe nga Shqipëria dhe vende të tjera fqinje. Këtë edicion veç artistëve janë të ftuar dhe historianë, muzikologë, etnomuzikologë, etj, ku ditën e shtunë që zhvillohet festivali do të ketë paradite dhe një tryezë diskutimi mbi polifoninë . Festivali këtë vit zhvillohet dhe nën kujdesin e Akademisë së Shkencave”, tregon këngëtari i polifonisë Yzeir Llanaj “Artist i Merituar”, “Mjeshtër i Madh” dhe kryetar i shoqatës “Polifonia shqiptare” me të cilën zhvillon dhe festivalin “Bylispolifonia”. Përpara zhvillimit të këtij edicioni, kryesia e Shoqatës Atdhetare Kulturore Mallakastra dhe shoqata mbarëkombëtare “Polifonia shqiptare” për dy ditë me radhë diskutuan për realizimin e festivalit të 11 të polifonisë,  i cili do të zhvillohet në qytetin antik të Bylisit, në Hekal të Mallakastrës, nën mbështetjen e kryetarit të Bashkisë së Mallakastrës dhe të prefektit të qarkut të Fierit. Këngëtari i polifonisë Yzeir Llanaj thotë se grupet janë nga Shqipëria, Bullgaria, Maqedonia e Veriut, Kosova, etj.  “Ky është një festival edhe ballafaques me fqinjët tanë dhe më gjerë. Nga vendi ynë marrin pjesë grupe polifonike nga Rrajca, Myzeqeja, Skrapari, Saranda, Gramshi, Vlora, etj, pra nga të gjithë trevat e polifonisë shqiptare toske dhe labe”, thotë Llanaj.

Vëmendje për polifoninë

Festivali “Bylispolifonia” në çdo edicionin të tij ka mbledhur grupe të ndryshme që kanë shpalosur vlerat e trashëgimisë. Këngëtari Yzeir Llanaj thotë se përmes festivalit përcillen dhe mesazhe për kujdesin dhe vëmendjen, që duhet treguar për polifoninë. “Ky festival vlen për të mobilizuar gjithë krahinat e vendit të marrin pjesë. Kjo pasuri këtu e ka rrjedhën e saj ndaj dhe bartësit e saj vijnë dhe shpalosin këngët e tyre të bukura. Për polifoninë kjo është një kërkesë, që ti tërheq vëmendjen dhe shtetit që të vërë dorë në këtë traditë mbarëkombëtare që ne krenohemi me këto vlera të trashëguara nga etërit tanë në shekuj. Ndaj e bëjmë dhe këtu festivalin në Bylis, që kjo të mos harrohet, por ti transmetohet të ardhmes ashtu si na e kanë lënë identike dhe neve”, shprehet Llanaj. Edicioni i parë i festivalit ndërkombëtar të polifonisë “Bylispolifonia” u zhvillua në vitin 2006 në vendin tonë.