Ndjekje si nëpër filma, pasagjerët filmojnë momentet e tmerrit që kaluan në taksi

Dy persona morën një taksi për të shëtitur natën në qytetin Richmond, në Virxhinia, SHBA, por nuk e menduan atë që do të përjetonin.

Makina me të cilën po udhëtonin u godit nga një tjetër, e cila u largua, dhe shoferi nisi ndjekjen e çmendur, skenë e denjë për filma aksion.

John Murray dhe Tameka Swan filmuan ngjarjen dhe u shprehën të tmerruar nga ajo që ndodhi. “Ishte momenti më i tmerrshëm në jetën time. Kurrë nuk jam frikësuar aq shumë. Ishte një makth”, -tha Swan.

“Taksia jonë u përplas nga një makinë dhe shoferi ndaloi për formalitetet, por drejtuesi tjetër u largua dhe aty nisi ndjekja e paprecedentë”.

Në një moment shoferi i telefonoi policies, ndërsa Tameka dëgjohet duke bërtitur dhe duke u thënë se shoferi nuk po i lejon të zbresin.

Dhe për ta tensionuar më shumë situatën, taksia pëson një tjetër aksident rrugor. Kompania “Uber” bëri të ditur se po heton rastin.