Akrobatja Fiona Rushiti, një performancë me hartën e Shqipërisë

Festat e nëntorit sollën aktivitete të ndryshme artistike dhe kulturore. Mes tyre edhe akrobatja Fiona Rushiti dhuroi një performancë të veçantë, që u shfaq në 110-vjetorin e Pavarësisë. Akrobatja Fiona Rushiti tregon se punoi për disa muaj për të realizuar këtë performancë me Shqipërinë etnike, që e solli për festat e 28 dhe 29 nëntorit. “Është harta e Shqipërisë e hapur dhe krahu i shqiponjës, që nënkupton Shqipërinë etnike. Janë 5 muaj projekt për t’u realizuar dhe skicën e kam ndërtuar vetë, ndërsa punën një miku im Bardhi Bicaj. Ne kemi punuar me orë të gjata. Puna përfundoi dy ditë përpara ditës që kishim lënë xhirimet”, tregon akrobatja Fiona Rushiti, që është e njohur për performancat e saj në lartësi në ajër. Xhirimet e kësaj performance u kryen më datë 25 nëntor në sheshin “Nënë Tereza”, për tu shfaqur dhe në rrjete sociale më pas me rastin e festave. Por akrobatja Rushiti tregon se koha për realizimin e saj ka qenë problem. “Unë kam qenë në stres, sepse mendoja që nuk do kishim mundësi ta realizonim në kohë. Por është një performancë dhe si një kundërpërgjigje për ata që na kanë quajtur kriminelë, prandaj në performancë kemi qenë me maska në fytyrë. Është zjarri, që nënkupton që asgjë nuk i djeg shqiptarët dhe janë të fortë si zjarri, dhe harta që nënkupton bashkimin e trevave shqiptare”, tregon akrobatja Rushiti, që performoi mes flakëve. Herë pas here në aktivitetin e saj akrobatja  e njohur Fiona Rushiti ka përcjellë për publikun performanca që janë zhvilluar në ajër, ku nuk ka munguar dhe më parë me rastin e festave. Por në aktivitetin e saj është dhe promovimi i trashëgimisë sonë kulturore përmes performancave nga ajri. Pas kësaj performance, që akrobatja solli me rastin e festave të nëntorit në shesh, në vijim të aktivitetit të saj ajo ka të tjera projekte.