Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Basha heq dorë nga kryeministër, zgjedh të bëjë prokurorin

Postuar: 13/08/2019 - 07:13

Pas betejave gati legjendare dhe revolucionit të bulevardit, bllokimit të shtigjeve dhe kryqëzimeve, përdorimit masiv të molotovëve dhe bëmave që çoroditën dynjanë, të gjallë e të vdekur dhe vet militantët e partisë së tij, Basha hedh hapin e ri. Si gënjeu aleatët përditë me përrallat e pushtetit të shpejt. Pasi u dha shpresa ëndërrore votuesve dhe qëndrestarëve që e kanë ndjekur në aventurat pafund, tragjike e komike dhe betimit se do jetë shumë shpejt kryeministri i Shqipërisë, papritur Basha bëri një kthesë 180 gradë. I mërzitur, i lodhur, i zhgënjyer me postin e ëndrrave, i etur për karrigen e njëshit të ekzekutivit dhe programeve të emetuara në eter nga selia e PD-së dhe premtimet për vendimet e ditës së parë, javës së dytë, muajit dhe vitit në vijim, si të fillonte një epokë të re, e veçantë e pangjashme me asnjë sistem të provuar nga shoqëritë post Krishtit doli me një kauzë të re. Duket se ka zgjedhur të bëj, jo kryeqeveritarin, po kryeprokurorin e kryefinancierin apo përgjegjësin e thesarit të shtetit, atë thesar që vite më parë e tretën miqtë e tij dhe mentorët mbi të. Në vijim të platformës së re, atë të bërjes së drejtësisë, si një kundërvënie e hapur ndaj reformës më të rëndësishme më të thellë, më të plotë me angazhimin e BE-së e SHBA-së dhe shteteve më të fuqishme të Evropës, me asistencën e institucioneve të specializuara në fushën e drejtësisë e kontrolluar në çdo centimetër dhe hap që bën. Reforma që pritet ti japë shqiptarëve për herë të parë në historinë e tyre shpresën për një drejtësi të barabartë për të gjithë, pa i klasifikuar shqiptarët, si kontingjent të burgut dhe të paprekshmit ose për të zënë në rrjetat e drejtësisë peshqit e mëdhenj, ata që kanë komanduar çdo arrestim dhe dënim deri sot. Kryeministri imagjinar, ka shpalosur platformën dhe strategjinë e tij, jo si politikan, po si kreu i drejtësisë. Si të bënte Zeusin dhe njeriun magjik, zbritur nga një planet i panjohur, i supozuar, si planeti i ndëshkimit, ka renditur shumë masa përmes të cilave do vendosë drejtësinë. Në ndryshim të thellë nga reforma dhe mazhoranca aktuale të cilën e do të gjithën pas hekurave, këtë drejtësi nuk e shikon si një atribut të organeve kompetente, të pavarura, po si një kompetencë të partisë. Pra drejtësi si deri sot. E gjitha e kontrolluar nga partia shtet,drejtësi sipas orekseve të “kryeprokurorit” të ri i cili nuk vjen nga shkollat juridike, nuk është magjistrat as nga emërtesat e KLP e KLGj, nga qeveria e drejtësisë, po drejtpërsëdrejti nga opozita rrugore, jashtë sistemit politik. Nuk është produkt i shkollës së drejtësisë është thjesht prurje nga partia. Sipas zakonit të partisë së Bashës, partisë shtet, i zotëron të gjitha kompetencat. Është partia që bën diellin dhe shiun, cakton cili është prioritar për tu dërguar pas hekurave, cili e ka radhën më pas. Kush do shkojë në qelitë VIP e cili do degdiset në burgjet e dorës së tretë. Sipas logjikës Basha dhe strategjisë që shpalos nga podiumet e selisë së PD-së, do jetë partia që vendos. I ka ajo në dorë prangat dhe prioritetet nga do nisin arrestimet. Dhe kuptohet i gjithë kontingjenti i arrestimeve fillon me ministrat dhe mbyllet me Ramën, kryeministrin, të anatemuarin e kërcënuarin permanent. Sa për Ramën, atij i tundin prangat çdo minutë pasi do jetë detyra e parë e “kryeprokurorit” Basha i cili ka kohë që lëshon fletë arreste dhe bën pretenca me preferenca. Pasi të mbaroj punë me qeverinë, radha u vjen oligarkëve. Lista e tyre është shumë e gjatë. Janë ata që fitojnë tenderë. Marrin PPP-të. Ata që zhvatin popullin deri në qindarkën e fundit me firmën e Ramës siç deklaron Basha. Çdo të nominuari për burg i caktohet radha. I vendoset numri rendor gdhendur në parakrah me ngjyrë blu. Mes funksionarëve që rrethojnë liderin, ky kontingjent burgaxhinjsh nuk thirret me emra, po me numra, si të internuarit e viteve të Luftës së Dytë Botërore, ku nuk kishte emra, po vetëm numra nëpër kampet e përqendrimit në Aushvic dhe Holokaust, ku përndiqeshin antifashistët e çifutët që u nënshtroheshin dënimeve shembullore. Nëse dëgjon fjalimet e kryedemokratit Basha të duket se ndjek sekuenca nga filmat e torturave dhe përndjekjeve, dënimeve me gjyq e pa gjyq të kundërshtarëve të boshtit të së keqes. Deri kohë më parë e mendonim se posti i të parit të qeverisë ishte synimi i Bashës, aq më tepër që këtë post mezi e presin mbështetësit e paduruar. Po ja që një ditë ai e “braktisi” këtë detyrë në emër të një qëllimi shumë më të lartë, atë të vendosjes së drejtësisë. Një drejtësi specifike që i kapërcen organet e drejtësisë dhe i dorëzohet ideologjisë dhe programeve të partisë. Shkurt, drejtësia që kemi përjetuar në sistemin monist, ku partia të arrestonte, të gjykonte, të dënonte dhe në fund të pushkatonte. Po si është e mundur që kryetari i opozitës, pretendenti për kryeministër t`i dorëzohet subjektivitetit partiak dhe të hartojë platforma të cilat janë kompetencë e drejtësisë dhe të bëjë hetuesin, prokurorin dhe gjyqtarin, si në kohën e partisë shtet, si në këto 30 vjet epokë nga e cila shqiptarët mezi presin të shkëputen për t`ia lënë drejtësisë, organeve që dalin nga reforma më e thellë dhe më e mbështetur në historinë e shtetit shqiptar?! Populli e përmbysi atë sistem. Në emër të drejtësisë. E flaku tutje praktikën e dënimeve nga partia, ku çdo individi i faturohej në shpinë, veç fajit të bërë edhe agjitacioni e propaganda pasi ishte një thes shumë i madh ku mund të futeshin brenda gjithë kodet penale dhe të penalizoheshin pa fund shqiptarët. Logjika e dënimeve nga pretendenti për kryeministër dhe betimet e tij se do bëj gjëmën me arrestime e dënime të atyre që i ka shkruar në listat e zeza të përngjajnë me veprimet e personazheve të Kadaresë, ku gjatë netëve për të dalluar individët që duheshin arrestuar, një dorë e padukshme shënonte mbi portat e shtëpisë, një kryq të kuq, shenjë nga e cila orientoheshin skuadrat e pushkatimit dhe arrestimeve për të dalluar antifashistët apo anti-nazistët. Dashuria e thellë që ka kapluar Bashën në vendosjen e drejtësisë sipas mënyrave të veta, është një deficit serioz në formimin e tij si shtetar i së ardhmes. Po është edhe një demagogji dhe hipokrizi e kulluar. Shqiptarët, gjatë historisë së tyre kanë provuar edhe drejtësinë e Partisë së Punës dhe vendimet e Byrosë Politike dhe për këtë u ngritën dhe i flakën. Kanë provuar edhe drejtësinë e paraardhësit të Bashës dhe janë tmerruar. Dhe rikthimi në këto praktika është i patolerueshëm për çdo qytetarë qoftë ai edhe “prokurori” i vetëshpallur, i cili krah teserës së demokratit, ka vendosur strategjinë e drejtësisë së partisë. Është për t`u shqetësuar se si një kryetar partie që pretendon se ka mbështetjen e 85 për qind të popullit dhe është në rrugëtimin për pushtet, të udhëhiqet nga instinkte të tilla që bien erë myk dhe nuk kanë asnjë mbështetje në masën e gjerë të shqiptarëve. Nuk kërkon zgjedhje po përmbysje me dhunë. Të gjithë prisnim që Basha të dilte në krye të qeverisë, ashtu siç ka deklaruar gjatë tërë këtyre viteve si i dalldisur. Askujt nuk i pëlqen kur ai kërkon të bëj prokurorin e të shfaqë përditë nga një platformë. Qytetarët qeshin kur dëgjojnë: Do t`i arrestoj. Do t`i dënoj! Përgatituni për të zënë qelitë! Do fut në burg atë! Do arrestoj këtë! Do ta shihini! Do e mësoni! Do ta dëgjoni! Dridhuni! Dorëzohuni! Dhe refreni këndohet si melodi zëçjerrë, stonues, siç këndon “Himnin shqiptar” prokurori më i ri, Basha para dhe pas përfundimit të protestave të dhunshme. Po jo vetëm prokurorin. Kryeopozitari i bulevardit të Tiranës, komandanti në përgatitje për të sulmuar institucionet, si paralele me hapjen e dyerve të disa bashkive, ku kryetarët pa mandat nuk dorëzonin karriget, bëhet gati për stinën e arrestimeve. Krahas prokurorit dhe gjyqtarit, po bën edhe audituesin si dublant i kryetarit të KLSH-së dhe të financierit. Nisë të bëj llogari. I dalin të gjitha shifra astronomike. I emërton vjedhje të shekullit. Bashës që shtatë herë shtatë i dalin dyzetë e dy me një të rënë të lapsit nxjerr zbuluar llogaritjet e ekspertëve për çdo vepër publike. Si gjithë historia e partisë që drejton, pushtetet i përkasin partisë. Financat. Reformat. Së pari drejtësia. Ndaj Basha e ka vendosur në “sekuestro konservative” synimin për të qenë kryeministri i Shqipërisë. Dhe ka nisur punën e drejtësisë, Basha, ky kryeprokurori i sotëm i Shqipërisë me sa duket llogarit me më shumë prokurorin se kryeministrin e qeverisë!

Nga Bardhyl Bejko

/Agjensia e Lajmeve Sot News/

Na Beni Like Ne Facebook: 

Lajme nga e njejta kategori

Postuar: 23/10/2019 - 07:20

Për opozitën tonë jashtëparlamentare si në tërë këto vite, gjithçka që ndodh në këtë vend individualizohet e pykëzohet në një emër të vetëm.

Postuar: 23/10/2019 - 07:18

Në raportin e zbatimit të buxhetit faktik të shtetit për vitin 2018, institucioni i auditimit më

Postuar: 23/10/2019 - 07:16

Me siguri na erdhi shumë keq të gjithëve për lojën që luhet si përherë në kurrizin e ne shqiptarë

Postuar: 23/10/2019 - 07:14

Marrëzia jonë, ka shkuar deri aty sa shumë kush të "zemërohet" me Francën!

Postuar: 22/10/2019 - 07:21

Ka tronditje të madhe në politikë për fundin e formimit të SPAK apo fillimin e punës së tij!

Postuar: 22/10/2019 - 07:14

Dihet që Këshilli Europian nuk arriti të marrë një vendim pozitiv për çeljen e negociatave me Shq

Postuar: 22/10/2019 - 07:13

Të trishtuar dhe humbës real nga vetoja e francezëve në Këshillin e Europës, ku presidenti Macron