Berisha kërkon ta burgosin, që të hyjë në histori si i dënuar politik

Duke parë se Berisha prej 30 vjetësh i ka shpërfillur organet e drejtësisë, duke mos bashkëpunuar me ato për të dhënë shpjegime për krimet e bëra, më kujtohet thënia dikur e një drejtuesi të lartë socialist: ”Sali Berisha kërkon të futet në burg, që ta quajnë të burgosur politik, por ne nuk e fusim nga inati. Ashtu të ngordhë i diskredituar moralisht, politikisht e fizikisht.“ Loja “e gjej s’e gjej” e SPAK me Berishën, tregon dy gjëra: ose Berishën e ka frikë, ose zvarritet qëllimisht që ai t’i shpëtojë dënimit me procedurë, siç kanë shpëtuar shumë ish ministra e ish deputetë në këto vite. Qëndrimi “taktik”për ta lënë Berishën jashtë hekurave të burgut, nuk funksionon, pasi ai ta merr për dobësi e frikë. Aq më keq, sikur qëndrimi ndaj Berishës, edhe kur ai shan e kërcënon përditë, të ketë brenda hilen e bashkëpunimit në fshehtësi, ashtu siç thonë mjaft njerëz pa pushtet se “të tre kokat e politikës bashkëpunojnë e mbajnë njeri- tjetrin.” Historia e këtij pushtetari bajraktar, që nuk ka lënë gjë të keqe pa bërë ndaj popullit, opozitës e demokracisë së këtij vendi, ka treguar se Saliu nuk ka pyetur as për ligj, as për shtet dhe as për izolimin e ndërkombëtarëve. Pasi bëri ca kohë sikur u tërhoq nga PD, ai na u shfaq përsëri më i egërsuar që mundohet të fshihet si një derr i plagosur nëpër kaçubat e një neni të Kushtetutës. Në historinë e pluralizmit shqiptar, Berisha ka qenë një ari i pangopur që fuste në “shpellën” e pushtetit që kishte ngritur, gjithçka; para, prona, pasuri, kufoma, duke ndjerë një kënaqësi sadisti. U desh ta plagosi rëndë DASH, që ai të dilte nga strofulla, e të hidhej në sulm si dikur, kundër të gjithëve, qeverisë, demokracisë, drejtësisë, opozitës, ndërkombëtarëve, vetëm që të mbrojë me çdo çmim familjen dhe oborrin e tij. Si atëhere, kur rrethonte parlamentin e zgjidhej President, tani thyen karriget, hedh flakadanë e godet me grusht kolegët e mazhorancës. Si atëhere kur e quante Prokuroren e Përgjithshme e Presidentin e Republikës “lavire “e “horr bulevardi”, tani i quan ata banditë, kriminelë, bastardë, dora e zezë e Edi Ramës. Tani, Berishës, që i ka bërë të gjithë të zezat këtij vendi e që e kanë braktisur të gjithë, brenda e jashtë, e quan fund të ndershëm burgun, që të ulurasë e të mbushi botën si i burgosur politik i Edi Ramës! Dhe deri diku ka të drejtë, pasi ligji shqiptar e ka lënë atë të justifikohet: “A nuk isha unë dy herë President, Kryeministër, Kryetar i PD dhe nuk më ngacmoi askush, madje më fërkonin shpatullat? A nuk isha unë që vidhja, vrisja, digjja e minoja demokracinë dhe ambasadori amerikan më quante burrë shteti? A nuk jam unë faktor i rëndësishëm politik, kur më vijnë pas si dele 40 deputetë? Ju doni të më futni në burg, pasi mbroj opozitarizmin dhe Kushtetutën.” Tani Saliun e bërë dordolec për të trembur sorrat, futeni ku të doni, por vetëm mos i prekni fëmijët dhe pasurinë marramendëse që ka vënë në kurriz të këtij populli fukara. Pretendimet e tij, se mbron Kushtetutën e opozitarizmin, janë gjethe fiku për të mbrojtur lakuriqësinë që i bëri DASH. Ulërit p.sh se është shkelur Kushtetuta për ngritjen e Komisioneve Parlamentare. Po sa herë janë ngritur komisione hetimore parlamentare, duke filluar nga Komisioni Ngjela për ngjarjet e ‘97 dhe deri tek i fundit për inceneratorët, të cilin Saliu e votoi kundër, dhe çfarë kanë zgjidhur në fakt? Asgjë. Më shumë kanë shërbyer si mburojë e vjedhjeve e krimeve të pushtetarëve. Saliu, i pushtuar nga deliri i madhështisë dhe “i trimëruar” nga disa të korruptuar që e ndjekin, kujton se mban monopolin e së vërtetës, por në fakt në çdo deklarim çaprashit vetëm gënjeshtra prej 30 vjetësh, të cilat iu kanë kthyer tani në boomerang. Ka deklaruar se disponon video erotike e korruptive, për pushtetarë, familjarë politikanësh, biznesmenë, por ne çuditemi pse nuk i nxjerr!? Ashtu siç na çuditi së fundi me “të vërtetat” e tij, se paska “dokumenta” për “ 6 kalimet e makinës me drogë të Edi Ramës në grupin e Xibrakës”, se “Nallbati nuk e ka goditur Sinajn”, se “gardisti ka qenë i armatosur”, e të tjera, edhe pse kamerat janë në sy të gjithë publikut. Sala i mban mend të gjitha, por pse nuk i kujtohet grushti Palokës ndaj Imamit opozitar, në sallën e parlamentit, i cili tani është bërë me prona në Bregdet? Deklarimet e tij haluçinante të kujtojnë “thikat me helm” e “çadrat pistoletë” të demonstrueseve, kur ai vrau si “burrë shteti” katër të pafajshëm. Berisha mund të na mbushte mendjen edhe me “faktin” tjetër, se Korreshi e Salanji nuk kanë hedhur tymuese, por e tradhtoi kënaqësia e këtij akti të turpshëm dhe zgjatja e pecetës Salanjit për të fshirë duart e nxira. Me faktet e të vërtetat “alla berishiançe” Saliu “mposhti” Blinkenin me gjyqin e Francës, “shpartalloi” Mbretërinë e Bashkuar, dhe tani është përgatitur “të fitojë” gjyqin ndaj z. Krichbaum, i cili jo vetëm nuk e takoi si të korruptuar, por edhe mbështeti akuzën e ngritur nga SPAK ndaj tij. Gënjeshtrës së Berishës se z. Krichbaum flet në emrin e tij personal, e rrëzoi shpejt Zëdhënësi i Grupit Parlamentar CDU/CSU, i cili theksoi : “z. Krichbaum është i autorizuar të flasë dhe të japë mesazhe dhe qëndrime në emër të grupit tonë.” “Kushtetutshmërinë” e gjeniut Sali, tani po e mbështet edhe Bardhi me “opozitarizmin” e tij të kulluar, duke shpresuar se shpejt do të bëhet Sali i dytë. Bardhi e quan të paligjshëm mbledhjen online të Konferencës së Kryetarëve, por nuk tundet nga “ligjshmëria” e zhvillimit të mbledhjes online të Këshillit të tij Kombëtar, të cilën nuk e pa dhe as e dëgjoi kush. Aktet e dhunshme në parlament të ashtuquajturit “opozitarizëm i bashkuar” në situatën e krijuar në vend, u vlejnë të dyja palëve, edhe mazhorancës së tejngopur me pushtet, edhe opozitës mjerane që nuk do ta marrë atë. E ç’u duhet pushteti shumë deputetëve të PD dhe krerëve të tjerë të opozitës, kur ata janë shpallur me kohë investitorë strategjikë e janë mbushur me pasuri gjer në grykë?! Por edhe për mazhorancën nuk ka qenë e vështirë të pastronte politikën nga ish-komunistët dhe spiunët sigurimit, për të cilin hartoi edhe një ligj që tani fle në sirtarët e parlamentit! Tani që Berishën e goditën ndërkombëtarët, ai i thotë me burrëri burgut ”hapu!” që të shkruajnë për të historianë si Ceka, se “ pas 60 vjetësh ai do të jetë Skënderbeu i dytë i këtij vendi. “ Figurën gënjeshtare dhe burracake, si dhe fundin e turpshëm të Berishës, e përcaktoi logjikisht para 30 vitesh Pashko, i eliminuar tani mafiozisht: “Ti mendon se je demokracia dhe e vërteta, por mos harro se do të vijë një ditë që do të japësh llogari, jo vetëm para zotit, por edhe ligjit”.