BREAKING NEWS

“Meta si oktapodi”, shpërthen Frrok Çupi dhe lëshon paralajmërimin ‘bombë’ për Presidentin: Çështja e floririt do të...

“Meta si oktapodi”, shpërthen Frrok Çupi dhe lëshon
x

Opinion / Editorial

Dështimi i opozitës dhe oferta e Ramës

Dështimi i opozitës dhe oferta e Ramës

Zgjedhjet kanë përfunduar, tash partitë kryesore duhet të tregojnë pjekuri dhe të kenë vullnet për të rishikuar planin strategjik të veprimit të mëtejmë politik. Në këtë sens opozita duhet të gjejë kurajo që të përballojë humbjen dhe të rishikojë shkaqet e dështimit të radhës, ndërkaq mazhoranca e rikonfirmuar duhet të përmbushë pritshmëritë e sovranit, i cili i dha mandatin historik (tri mandate qeverisëse). Gjithsesi, këto dy çështje duhen analizuar me kalimin e kohës, por ajo që është e rëndësishme dhe kërkon gjykim të ftohtë ka të bëjë me situatën para dhe pas zgjedhore. Nga ky aspekt lajmi kryesor është: dështimi i PD-së që nuk arriti të përmbushë objektivin si subjekt politik dhe nga ana tjetër është fitorja bindëse e PS-së ku Rama ka përmbysur të gjitha parashikimet e kritikëve të tij duke u rikonfirmuar si kryeministër për të tretën herë radhazi. Në këto kushte, pyetja që shtrohet është: Përse humbi opozita dhe cilat ishin shkaqet?! Shkaqet e dështimit janë të shumta për rrjedhojë analiza duhet të nisë te situata parazgjedhore duke u ndalur te dita e zgjedhjeve dhe më pas duke konkluduar atmosferën pas zgjedhore. Siç thotë një fjalë e urtë popullore, siç e nisën e bitisën, çka do të thotë se PD dhe LSI filluan dhe mbaruan me histori dështimi. Mjafton të kthehemi pas në kohë dhe aty e gjen shkakun kryesor: braktisja e Parlamentit dhe më vonë ajo e zgjedhjeve lokale ishin veprime të paprecedenta dhe idioteske. Ashtu si shumica, kam patur bindjen e thellë se qysh aty nisi tatëpjeta e veprimit opozitar për të qenë sfiduese reale e zgjedhjeve. Një tjetër shkak tejet i rëndësishëm dhe që pati kosto të madhe në këto zgjedhje ishte bindja kolektive e shqiptarëve se opozitën e drejton dhe e menaxhon dyshja Berisha-Meta. Nuk ishte rastësi që mbi këtë logjikë kryeministri Edi Rama e orientoi debatin publik dhe drejtimin e fushatës. Nëse hyjmë në detaje një tjetër element i rëndësishëm i humbjes së opozitës ishte dhe mbetet mungesa e besimit të lidershipi i saj, i cili nuk ngjalli as frymë dhe as besim. Për më tepër Basha dhe Monika nuk e patën të lehtë përballë një kryeministri dhe një qeverie, të cilët duam apo jo përballuan me sukses dy momente kulmore siç ishte pandemia dhe tërmeti. Për t’i vënë vulën humbjes së radhës mjafton të kthejmë shiritin prapa dhe aty del në pah, fjalori lajthitës dhe hyrja në fushëbetejë e Presidentit të Republikës, i cili e hodhi opozitën në gropën e destruktivitetit. Pra, përgjithësisht këto janë disa nga shkaqet e humbjes dhe dështimit të radhës së opozitës… Tashmë është në dorën e anëtarësisë së PD-së dhe në drejtuesve të saj për të rishikuar dhe bërë një katarsis brenda skuadrës së tyre ku në opinionin tim timonieri i deritanishëm duhet t’i dorëzojë çelësat dikujt tjetër. Gjithsesi kjo është çështje e brendshme e tyre, por ajo që mund të them është se me Bashën jetëgjatësia e Ramës në pushtet nuk do të njohë limite.

***

Aktualisht me shumë sesa fati i lidershipit të PD-së është së çfarë përfituan shqiptarët dhe Shqipëria nga këto zgjedhje. Pikësëpari mendoj se këto zgjedhje patën një risi: ishin të paqëta, të qeta duke u respektuar vullneti i qytetarëve. Më së miri këtë e konfirmon faktori ndërkombëtar, kryesisht SHBA dhe BE, të cilët në mënyrë të “rrufeshme” legjitimuan procesin zgjedhor duke uruar Ramën për mandatin e radhës dhe Bashën për impenjimin e në proces. Një tjetër element po aq i rëndësishëm ka të bëjë me faktin se për herë të parë Shqipëria u zgjua më 27 prill si një vend që ka lënë prapa krahëve kaosin e procesit të numërimit dhe të kontestimeve.

Pra, Shqipëria në sytë e aktorëve ndërkombëtarë gradualisht po del nga qerfulli i tranzicionit dhe po shtron udhën e përmbushjes së kritereve për të qenë shtet dinjitoz dhe me demokraci të qëndrueshme. Në vijë të këtyre konstatimeve shoh edhe qëndrimet e kryeministrit Rama, i cili në çdo dalje publike para dhe pas zgjedhjeve ofron bashkëpunim me opozitën. Pra, Rama përveç të qënit kryeministër kërkon të hapë një kapitull të ri bashkëpunimi me opozitën. Ai kapet fort pas ofertës për bashkëpunim mes maxhorancës dhe opozitës për gjëra madhore. Këto elemente kanë të bëjnë kryesisht me hedhjen pas krahëve të politikave konfliktuale dhe nga ana tjetër me unifikimin politik që ka të bëjë me çështje të rëndësishme për vendin dhe kombin.

Sinjalet e kryeministrit janë shpresëdhënëse! Tash duhet të presim a do ta kapërdijë opozita humbjen? A do të zgjidhe konfliktin e brendshëm që tashmë e ka shpërthyer dhe më kryesorja a do të gjejë forcë lidershipi i PD-së të ndahet njëherë e mirë nga lideri de fakto?! Duke u nisur nga këto dilema, sado oferta e kryeministrit mund të jetë e sinqertë, idetë mbeten në kuadrin teorik për sa kohë që PD-ja nuk zgjidh çështjet e brendshme dhe nuk hedhin hapin e madh të bashkëpunimit. Çdo projekt për t’u implementuar në praktike kërkon dy palë: Rama thotë jam i gatshëm, tash mbetet të shohim ç’do të bëjë opozita?! Në pritje të zhvillimeve dhe në vend të konkluzioneve duhet theksuar me forcë: tash nuk kemi asnjë çast kohë për të humbur. Shqipëria dhe kombi shqiptar meriton të jetë pararojë e rajonit si në aspektin e funksionimit të shtetit po ashtu edhe në unifikimin e kombit.

*Autori është Dr Shkencave Mjekësore dhe President i Shoqatës Oftalmologjike Shqiptare (SHOSH)