Dita Ndërkombëtare e Paqes ose Lutjes për Paqe

Në kalenderin vjetor të Kombeve të Bashkuara data 21 shtator është shumë e veçantë, sepse atë kremtohet dita ndërkombëtare e Paqes ose Dita Botërore e Lutjes për Paqe. Në kohën, që po jetojmë dhe po përjetojmë, shihen dhe vihen re nëpër botë, në pjesët më të madhe të rruzullit tokësor vetëm luftra, konflikte dhe luftime me armë. Nëpër lajmet ndërkombëtare, në mediat botërore shikon vetëm gjak dhe shumë gjak, që derdhet lumë dhe shkon dëm për të kënaqur tekat dhe interesat e një grushti të vogël njerëzish, që duan të sundojnë mbi shumicën. Për të ardhur shumë keq! Shumica e njerëzve janë kthyer në meskinë dhe në robotë njerëzorë, që duket, sikur janë programuar për të kryer disa programe të caktuara dhe harrojnë të kryejnë detyrat e tyre të caktuara nga Perëndia. Dhe ato janë: Të falin dhe të japin dashuri! Të ndihmojnë njëri – tjetrin, kur janë në nevojë! T`i shtrijnë dorën tjetrit, që të japin dhe të marrin falje! Të duam dhe t`i kushtojmë shumë rëndësi familjes sonë! Të mos braktisim njerëzit tanë të afërt dhe t`i lëmë në mëshirë të fatit! Prandaj më 21 shtator të vitit të largët 1981 Asambleja e Përgjithshme e Kombeve të Bashkuara (OKB) bëri një deklaratë të fortë botërore: “Kjo ditë duhet të emërtohet dhe festohet zyrtarisht si Dita Ndërkombëtare e Paqes dhe duhet të përdoret për të respektuar dhe forcuar idenë e paqes si brenda vendeve dhe popujve, ashtu edhe mes tyre.“ OKB-ja theksoi, që në këtë ditë duhet të mos ketë luftra dhe vetëm armëpushime. Atë ditë duhet të mbizotërojë dashuria dhe jo dhuna midis njerëzve (Pse mos të ketë paqe gjatë gjithë viteve? Pse të mos sundojë dashuria dhe harmonia kudo në botë?). Por çdo ditë dëgjojmë dhe lexojmë dhunë dhe dhunë vetëm dhunë, violencë, luftë për të shkatërruar dhe për ta rrënuar njëri – tjetrin. Kjo ditë u vendos pas një fushate të gjerë të organizuar nga regjizori britanik Jeremy Gilley dhe lëvizja e tij Peace One Day për të bërë një ditë në vit ditën e armëpushimit botëror. Prandaj Asambleja e Përgjithshme e OKB-së vendosi unanimisht, që të gjitha vendet anëtare të saj duhet të festonin në mbarë botën në të njëjtën ditë çdo vit më 21 shtator Ditën e Paqes. Po ashtu që nga viti 2004 Këshilli Botëror i Kishave (ËCC) u ka bërë thirrje të gjitha kishave mbarë botën, që datën 21 shtator ta kthejnë në Ditën Ndërkombëtare të Lutjes për Paqe, “si një mënyrë për të shprehur dëshminë e kishave dhe komuniteteve fetare për forcat e shumta të lëvizjes globale. për paqen dhe drejtësinë.” Por e keqja është, se të gjithë flasin për paqen, por të gjithë e dinë, se nuk mund të ekzistojë paqja, nëse brenda shpirtit dhe zemrës së njerëzve rritet urrejtja dhe mëria dhe zilia. Por siç ka thënë i madhi Mustafa Qemal Ataturku, kur ka paqe në shtëpi, ka paqe edhe në botë!