Ish...

Ore vëlla, si je?

Më dëgjo me vëmendje.

Do zbresësh nga rruga e spitalit. Te gropa, hë ore atje te ish- kinema "Ali Demi". Do ecësh drejt. Do kalosh ish- sheshin para bashkisë djathtas dhe ish- hotelin e kinezëve. Do kalosh edhe ish- Mapo-n.

Mu te ish- Kapelja ke disa variante.

Ose do kthehesh majtas drejt ish- Sheshit të Flamurit. Mos kërko të orientohesh nga ish- Monumenti i Pavarësisë, apo nga ish- Shtylla e Flamurit, se nuk duken më. Kupton? Do lësh pas ish- Katër Topat dhe ish- Grevën, ose do mbash djathtas në drejtim të ish- Merkatos; aty ore, ku është ish- Sahati që nuk punon.

Mund të ecësh drejt në ish- Rrugën e Re dhe përpara do gjesh ish- poçerinë ose ish- Fabrikën e tullave.

Por kur je te ish- Merkatoja mund të vazhdosh majtas drejt ish- Gjyqit të Vjetër.

Unë të këshilloj që te ish- Kapelja të ecësh drejt, të kalosh ish- Shtëpinë e Pionierit, ish- Shtëpinë e Oficerëve, ish- Adriatikun...

Vajte? Xham fare. Tani... Jo, jo, mos u ngatërro fare me ish- Agjencinë e udhëtarëve, se nuk ekziston më.

Mos ec drejt ish- Fushës së Aviacionit dhe as drejt ish- Fushës së Druve.

Ec në drejtim të ish- stacionit të trenit, të atij ore, që i duhej Vlorës, që të vente babai të takonte djalin ushtar në Shkodër. Ec drejt dhe kalo ish- parkun...

Pse nuk më beson. Në Vlorë jam. Jam mu te ish- Kulaçi. Aty pra, ku më parë shihej ish- deti dhe gjendej ish- porti i Skelës...

Po, ore po.

Jam fiks mu përpara ish- Perlat Rexhepit.

Po të kthehesh nga ish deti, në të majtë tënde është ish turizmi i ish Skelës, nga ku po të shohësh në horizont do të dukej ish- Shkolla e Marinës dhe ish- Belvederja...

Ohuuuuu. Më lodhe! Sikur nuk je nga Vlora!...

Pyet ndonjë ish vlonjat dhe takohemi aty te ish Tre Racat, apo te ish Orizi...

Jo, jo. Më mirë te ish Kombinati, se aty ka ca kafe me raki të mirë.

Hajde shëndet, derman...

Ma mbarove ofertën fare...