BREAKING NEWS

Përditësimi zyrtar/ Rritet sërish numri i të prekurve me Covid-19, Ministria zbulon shifrat e 24 orëve të fundit

Përditësimi zyrtar/ Rritet sërish numri i të prekurve me
x

Opinion / Editorial

Koronavirusi nuk pyeti për dollarë e euro, as për të fortët e pushtetit, as për raketat, tanket e  avionët

Koronavirusi nuk pyeti për dollarë e euro, as për të

Koronavirusi erdhi dhe nuk pyeti askënd dhe asnjë. Bota, i gjithë njerëzimi sot është nën kërcënim dhe në ankth prej pandemisë. Përballë këtij rreziku të gjithë janë e ndjehen njësoj të kërcënuar, si ata që kanë miliona e miliarda dollarë  dhe euro, si ato shtete të forta e të fuqishme ekonomikisht dhe financiarisht, si ato të varfra e të dobëta. Por viruse janë  edhe ato që i “prodhon” vetë njeriu, janë ato viruse që sjellin jonormalitete shoqërore, vuajtje, rreziqe e kërcënime dhe dëme njerëzve dhe shoqërive lokale dhe asaj globale. Virus është ndotja e ajrit, helmimi i tij nga veprimtaria e papërgjegjshme e njeriut me emetime të gazrave e helmeve nga makinat, avionët e fabrikat; virus është ndotja e ujit të lumenjve, liqeneve, detrave dhe oqeaneve; virus është ndotja e tokës , prerja dhe shkatërrimi i pyjeve dhe prishja e habitateve dhe e biodiversitetit; virus është krimi, korrupsioni dhe sëmundjet e rënda që vijnë prej  politikës së sëmurë. Sot sikur është harruar gara për armatime e shpenzime marramendëse për teknologjinë vrastare njerëzore.

Nuk i erdhën në ndihmë njerëzimit as armët bërthamore, as tanket, as aeroplanët dhe as raketat dhe as teknologjia e sofistikuar ushtarake e kozmike. Sa mirë do të kishte qenë që këto shpenzime të kishin shkuar për paqen, për shëndetësinë, për të mposhtur dhe zhdukur varfërinë, mjerimin dhe etjen; të kishin shkuar për arsimimin, për punësimin, për mbrojtjen e mjedisit dhe jo për të kundërtën, për në dëm të njerëzisë dhe planetit.

Njerëzimi duhet t’i kthehet normalitetit, dhe normalitet do të thotë paqe, siguri jo konflikte; normalitet do të thotë vetëkufizim dhe frenim  i lirive negative të egoizmit dhe të pandjesisë e të padhimshurisë shpirtërore; normalitet do të thotë   më shumë përgjegjësi e respekt për veten por edhe për të tjerët; normalitet do të thotë  përgjegjsi për tokën , ujin , ajrin dhe planetin i cili na mundëson jetën. Virusi po kërcënon njerëzimin, njerëzimin i cili është bërë kërcënim për planetin dhe për vetë jetën e tij.