Me këtë yrysh, foltoristët dhe bardhistët do bëhen nga njëherë kryetar të çdo komisioni parlamentar

Pasi u ulën në kolltuqet ministrore për gjashtëdhjetë minuta në sulmin e parë në sallën e Kuvendit  të Shqipërisë, deputetët foltoristë së bashku me ata bardhistë që çoi në pajë drejt Berishës Gazmend Bardhi pas braktisjes të Bashës për tek Berisha, lakmia për poste karrigesh u shumëfishua. Dy herë në javë, sa mblidhet parlamenti dhe çdo ditë, komisionet parlamentare, në emër të revolucionit të kaosit për të penguar veprimtarinë normale të punimeve të tij çdo deputet opozitar zgjedh të pushtojë një karrige të rëndësishme ministrore apo kryetar komisionesh kuvendore. Pas uzurpimit të karriges  së Kryetares së Kuvendit, kryeministrit dhe ministrave më me peshë, ekonomisë, punëve të jashtme, të brendshmit, ekonomisë, shkurt gjithë qeverisë, radha u erdhi karrigeve të anëtarëve të komisioneve parlamentare. Kështu me Komisionin e ekonomisë, çështjeve sociale,  Integrimit, ku për një deputet opozitar, që i përket PD-së, vendosi të bëhet pjesë e këtij komisioni, çoi në përleshje fizike mes deputetëve që deri dje jetonin nën të njëjtën çati, atë të PD-së. Po nuk u pushtua vetëm Komisioni i Integrimit. Të njëjtin fat pati edhe Komisioni i Sigurisë Kombëtare. Deputeti i “Rithemelimit”, Flamur Noka, zgjodhi t’i zërë kolltukun, kryetarit të këtij komisioni, Nasip Naço. Dhe me këtë ritëm që ecën zaptimi i komisioneve dhe pengimi i diskutimeve të rëndësishme në to i bie që kryetarët aktualë ata të zgjedhur nga vota në kuvend sipas rregullores së funksionimit të parlamentarizmit bëjnë karrigethyerin, siç janë etiketuar më parë, ata që kërkonin të vinin në pushtet, po që kurrë nuk guxuan të zënë karriget e deputetëve kundërshtarë në emër të revolucionit për t’u rrëmbyer qoftë simbolikisht karriget  deputetëve përballë. Mosbindja civile e deputetëve zhvillohet në forma nga  më të paparashikuara. Grumbullimi i karrigeve njëra mbi tjetrën. Togu i karrigeve kapicë,  ngjashëm me piramidat. Shkulja e mikrofonave. Ndezja e flakadanëve.  Zaptimi i foltores. Aksioni i një pjese të opozitës në emër të mbrojtjes së kushtetutës dhe qëndresës ndaj mazhorancës për të fituar të drejtat e tyre të bëjnë opozitën, vazhdojnë të krijojnë kaosin me të gjitha rrugët, duke hyrë sa nga dyert edhe nga dritaret në pallatin e deputetëve të popullit. I gjithë ky aksion shitet në emër të mbrojtjes së kushtetutës. Po realisht zhvillohet në emër të rrëmujës. Në interes të mbrojtjes së Berishës. Deputeti, Flamur Noka, duke u ulur në karrigen e kryetarit Naço në realitet nuk është se bëri ndonjë kapërcim të madh. Ai vjen nga radhët e deputetëve që kanë mbajtur poste të rëndësishme të sigurisë kombëtare. Kështu që është në ujërat e veta. Tek e fundit ka qenë Ministër i Brendshëm dhe ia ka anën sigurisë. Kështu që nga ata deputetë që kanë hyrë për herë të parë në parlament dhe ngjiten si me sustë drejt e në karriget e ministrave të qeverisë, pa pasur asnjë post më parë, nuk iu takon fare të ndërmarrin të tilla “përgjegjësi” edhe pse janë thjesht simbolika të kaosit, siç e cilëson Bardhi lëvizjen kaotike për t’u mbyllur gojën deputetëve të mazhorancës, të cilët nga deputetë fizikë më së fundi janë  shndërruar në deputetë telefonik, sikur të punonin në call center. Siç theksuam, deputeti Noka edhe pse zapton karrigen e kreut të Komisionit të Sigurisë, për begraundin që ka zuri një karrige shumë modeste krahasuar me postin e ish - Ministrit të Brendshëm që ka mbajtur në Republikën e Shqipërisë në qeverinë “Berisha”. Tek e fundit është sakrificë kur një ish - ministër pranon të ulet tek karrigia e një kryesuesi të komisionit, qoftë ai edhe i sigurisë. Deputetët e tjerë u bënë “ministra” pa kaluar asnjë shkallë pushteti dhe askush nuk u habit. Punë e madhe që Noka u bë kryetar për disa minuta i komisionit. Në garën  për t’u bërë “pushtetarë” jo me votë,po me pallë dhe me kaos parlamentar, shumë shpejt do shikojmë, si në pasarelë, tërë deputetët opozitarë të vihen në garë, ku secili të zërë karrigen më të parë dhe të brohorasin: U bëmë pushtstarë!Nuk ka asnjë rëndësi kush do bëhet për pak minuta  ministër, e cili prej deputetëve foltoristë apo bardhist, kryetar në komisionet parlamentare. Me këtë vrull që kanë ndërmarrë deputetët e kaosit parlamentar nuk do mbetet asnjë prej tyre pa u vetemëruar ose ministër dublant në qeveri ose kryetar i çdo komisioni. Në këtë mënyrë të ardhjes në pushtet, secili zgjedh mënyrën e vet për t’u bërë qoftë edhe simbolikisht pushtetar në pushtetin legjislativ në Kuvendin e Shqipërisë. Nuk ka fare rëndësi në se pushtetar bëhesh me votë apo përmes kaosit në parlament. Deri tani kaosi ka konfirmuar se pushteti me votë është një rrugë e shkuar, po kaosi opozitar është pushtet i garantuar. Dhe revolucioni i kaosit sapo ka filluar. Përfytyro, o shqiptar me këtë yrysh që ka ndërmarrë, ku kemi për të përfunduar!