Ngjarja tragjike e “21 janarit” po lakohet, përflitet dhe atakohet, por a do të hetohet?

Ngjarja e tmerrshme dhe e paprecedentë e 21- janarit këto ditët e fundit po trajtohet intensivisht dhe pa ndërprerje . U shqyen ekranet televizive , gazetat u mbushën dëngë e cepë më cepë ndaj kësaj ngjarjeje tronditëse e të paprecedentë ku u vranë barbarisht 4 qytetarë të pafajshëm që po marshonin paqësisht e me duar në xhepa përgjatë bulevardit Dëshmorët e Kombit, para kryeministrisë. Madje edhe faktori ndërkombëtarë e ka dënuar këtë ngjarje makabër dhe ka kërkuar që të hetohet me transparencë juridike , e të dënohen ashpërsisht shkaktarët. Natyrshëm mua dhe jo vetëm më lind pyetja: axheba a do të hetohet kjo çështje , dhe kur , se njerëzit e sidomos të moshuarit po vdesin duke pritur . Nisur nga gjëmat dhe bëmat tronditëse që kanë ndodhur këto 30- vjet tranzicion në vendin tonë jam pesimist përsa i përket hetimit dhe gjykimit të kësaj ngjarje makabre . Dhe arsyetoj kështu me pesimizëm të pa lëkundur pasi tek ne kanë ndodhur ngjarje të llahtarshme si falimentimi i firmave piramidale , ku qindra mijra qytetarë shqiptarë humbën kursimet e tyre që i kishin kursyer e mbledhur lekë- lekë e i kishin vënë më një anë për një ditë të keqe por që shkuan dëm e për dhjamë qeni siç thotë populli ynë i mençur dhe i urtë e punëtorë , patriot, liridashës dhe atdhetarë. U vodh rezerva e floririt dhe rezervës shtetërore në qafë Krrabë ku dyshohen dhe lakohen edhe ish kryeministra , presidentë e ministra pelivanë , ndodhi ngjarja më e paprecedentë e vitit të mbrapshtë të 97-tës , ku u shqyen edhe shpartalluan depot e armatimit .Dhe shteti u shkoqë e u shkërmoq dhe u bë çikë e copë ku u vranë mbi 2000 qytetarë të pafajshëm dhe shteti ra dhe u rrokullis në humnerë sikur ti kish shtyllat prej argjili. Ndodhi grusht i shtetit i vitit 1998, ndodhi shpërthimi nuklear i gërdecit gjatë demontimit të municioneve ku humbën jetën qytetarë përfshi edhe fëmijë dhe u plagosën qindra qytetarë si dhe u dëmtua rëndë mjedisi rreth e përqark . Dhe gjithë këto fatkeqësi nuk na i shkaktoi as serbi dhe as greku por u shkatërruan nga politika e mbrapshtë dhe keq qeverisja dhe mungesa e drejtësisë që deri tani ka bërë gjumin e rëndë letrargjik apo ndoshta ka ikur në drejtim të paditur. Se sa herë kontrolli i lartë i shtetit ka raportuar për qindra e qindra milion euro dëme në arkën e shtetit që rëndojnë si shkëmb në shpatullat e qytetarëve të pafajshëm .Dhe gjykoj se të gjitha këto kanë ndodhur sepse nuk ka reaguar dhe reflektuar drejtësia. Në lidhje me këtë çështje , Hasan Zyko Kamberi ka thënë: “Kadiut po i rrëfeve paranë ters e vertitë sherianë, për para shet tanë’. Pra nga kjo thënie brilante dalim në konkluzionin e pagabueshëm se kemi një korrupsion galopant e të marramëndshëm që i ka shtrirë tentakulat e tij kanceroze në gjithë jetën dhe veprimtarinë politike, ekonomike, shoqërore e sociale . Dhe korrupsionin kush mund ta ndalë përveçse ligji dhe drejtësia? Një shtet pa drejtësi është si shtëpia pa çati, i ekspozuar ndaj shiut, erës, borës, furtunës dhe stuhisë. Pra jetojmë dhe punojmë përballë një realiteti , nga politika në përgjithësi dhe nga qeverisja në veçanti kërkohet domosdoshmërisht ndërhyrje , punë, pasion,vendosmëri, impenjim , drejtësi dhe energji reflektuese.Gjithsesi shpresoj dhe besoj dhe jam optimist se SPAK- u nën drejtimin e juristit të plotësuar juridikisht do ta vendosë drejtësinë tonë në shinat e duhura dhe nëse e bën këtë do të bëjë histori për shtetin dhe drejtësinë shqiptare  e patjetër do të bëjë histori edhe për vete si jurist i talentuar dhe si profesionist e që shpresoj të hetojë edhe “21 janarin”.