Prononcim dhe këshillë modeste për bashkitë, firmat e ndërtimit dhe veçanërisht për Institutin e Ndërtimit...

Duke marrë shkasë nga zjarri i ndodhur në një pallat në Tiranë... Zjarri ishte kryesisht në sipërfaqen e jashtme (fasadë) dhe në dy tre hyrje edhe brenda.... Këto të dhëna nga informacionet e institucioneve përkatëse. Pse ka ndodhur zjarri ?! Sipas gjykimit tim, si specialist mbi 40-vjeçar i plastikës, nuk mund të rri indiferent, duke dhënë kështu mendimin tim... Pallati është veshur me kapotë polistiroli dhe i suvatuar me shtresë inerte nga jashtë. Polistiroli i ekspanduar (në formë shkume) quhet dhe stiropor. Në terma kimike polistiroli është një hidrokarbur me zinxhir të gjatë atomesh karboni që u bashkëngjiten grupet fenilike. Formula kimike është (C8H18)n, pra është një hidrokarbur aromatik që digjet duke dhënë monoksid karboni dioksid karboni dhe ujë (avuj).... Polistiroli është i ndezshëm dhe klasifikohet sipas DIN 4102 si një produkt me simbolin "B3" që do të thotë ekstremisht i ndezshëm... Edhe pse është një izolant efikas optimal, falë strukturës së tij me celula të mbyllura, ku 98 % është boshllëk, përdorimi i tij është i ndaluar në çdo instalim të ekspozuar në ndërtimin e ndërtesave, nëse materiali nuk është i pandezshëm, gjë që realizohet duke shtuar gjatë polimerizimit, shtesa kimike që shuajnë flakët. Në rast se polistiroli nuk mbart këtë veti specifike atëherë panelet e ekspozuara prej tij, duhet të fshihen midis ose prapa fletëve metalike apo blloqeve të betonit, mureve të tullave dhe midis shtresave të tarracave... Materialet e fryra prej polistiroli janë ndezur aksidentalisht duke shkaktuar zjarre të mëdha, siç është rasti në aeroportin ndërkombëtar të Dusseldorfit. Meqenëse polistiroli ka një vlerë të lartë kalorifike dhe krahasohet me qymyrin dhe petrolin, mbetjet e tij janë problem në gjithë botën, prandaj ato digjen duke dhënë energji termike dhe elektrike... Gjithçka e thënë më sipër, lidhur me polistirolin bazohet në studime e kërkime, që kanë bërë me kohë eksperimentues e shkencëtarë të tjerë për izolueshmërinë e djegshmërinë e polistirolit, të dhëna këto të ngurtësuara në Normativa Europiane, siç është dhe CE 1935/2004. Këto mendime e vlerësime modeste duhet të kihen parasysh nga të gjitha Bashkitë e vendit që jo vetëm lejojnë, por edhe stimulojnë pagesën 50% të kostos për veshjen e pallateve. Edhe firmat e ndërtimit të mos luajnë rolin e të paditurit, por të ndalohen e të ndërgjegjësohen për rreziqet që mund të shkaktohen me zjarret. Nuk duhet lënë jashtë vëmendjes Instituti i Ndërtimit, i cili duhet të përfshihet seriozisht duke vënë vija kufizuese të përdorimit dhe kushtet teknike duke krijuar kështu bazën për vendime nga institucionet përkatëse.