Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Pse duhet protestuar me 29 shtator!?

Postuar: 26/09/2018 - 07:24

Askush nuk e ka menduar që pas afro 20 viteve në liri dhe mbi 10 viteve të njohjes ndërkombëtare të shtetit të Kosovës (17 shkurt 2008), do të ketë nevojë për protestë mbarëpopullore për mbrojtjen e shtetit nga invazioni politik i Serbisë dhe largimin e uzurpatorëve të shtetit nga pushteti! Të gjitha partitë që qeverisën me vendin nga paslufta deri më sot, qytetarëve nuk u sollën gjë të mirë, përveçse vuajtje e mjerim, mashtrime e zhgënjim deri në thyerje të shpresave për largim nga vendlindja e tyre. Klasa e kusarëve të pangopshëm politikë, për ruajtjen e pasurive të tyre milionëshe, të krijuara përmes aferave korruptive, hajnisë dhe krimit të organizuar, janë shndërruar në shkatërrues fatal të shtetit të Kosovës. Situatën e heshtur të popullatës, janë duke e shfrytëzuar në mënyrën më të "mirë" pushtetarët, liderët e dështuar duke u thirrur në liberalizimin e vizave dhe proceset integruese të vendit si mashtrim për qytetarët. Servilët dhe puthadorët e pushtetit, matrapazët dhe injorantët politikë, sikurse dje, sot dhe në të ardhmen do të jenë të gatshëm të tradhtojnë prapë interesat e shtetit dhe besimin e qytetarëve të vendit.

Personaliteti i dyfishtë i liderëve partiakë

Pushtetarët e sotëm derisa ishin në opozitë, i kundërshtonin me të gjitha mjetet veprimet antishtetërore dhe antikombëtare të qeverisë së kaluar, sot janë më të zëshmit për miratimin e atyre marrëveshjeve fatkeqe për vendin të nënshkruara nga oponentët e djeshëm politik! Më e rëndë se degradimi i subjekteve politike, është heshtja qytetarëve kundrejt keqqeverisjes, përderisa e pajustifikueshme mbetet heshtja dhe indiferenca e popullatës kundrejt pazareve të fshehta politike. Situatën e heshtur të popullatës, janë duke e shfrytëzuar në mënyrën më të mirë pushtetarët, liderët sa të dështuar, po aq të korruptuar dhe shantazhuar, që tashmë janë duke u përballur me sfidat e kauzave të rrejshme përmes të cilave erdhën në pushtet. Për më keq se kaq, i harruan kauzat, i gëlltitën premtimet dhe hëngrën "qershitë e lagura" duke u bërë marioneta të presidentit Thaçi në dialogun vrastar të Brukselit. Dëmet që i ka shkaktuar vendit kjo klasë politike në pushtet janë të mëdha dhe të pariparueshme. E kam thënë vite më parë, po e përsëris prapë, sikur të ishte i vetëm Hashim Thaçi, e keqja për vendin do të ishte më e vogël. 

E që nuk është i vetëm Hashim Thaçi, u dëshmua edhe në takimin e fundit në Bruksel. Hashim Thaçi nuk ishte e keqja e vetme për vendin përgjatë këtyre gjashtë vjetëve dialog me Serbinë. Bashkë me të ishin të gjitha partitë politike, me përjashtim të VV-së.

Hyrja në bisedime të pabarabarta, fatale për Kosovën

Hyrja e Kosovës në bisedime me Serbinë si palë e pabarabartë, gjegjësisht si subjektivitet nën Rezolutën 1244 të KS të OKB-së, e jo si shtet i pavarur, përkatësisht me fusnotë* e pa Republikë, e ka bërë Serbinë superiore në të gjitha takimet, duke e trajtuar Kosovën herë si provincë (krahinë) e herë si koloni të saj! Nga fillimi i bisedimeve e deri më sot, politika kosovare në dialog me Serbinë ka qenë pa krye dhe pa platformë të bisedimeve, duke e ulur tej mase peshën e bisedimeve, të cilat janë realizuar gjithmonë në favor të Serbisë. Negociatorët kosovarë në bisedimet me Serbinë në Bruksel asnjëherë nuk kanë qenë në nivelin e përgjegjësisë shtetërore, si në aspektin formal ashtu edhe atë praktik.

Presidenti Thaçi, i vetëzgjedhur kryenegociator i fazës finale të bisedimeve me Serbinë në Bruksel, ditëve të fundit ishte i fokusuar në blerjen e opozitës së përçarë kosovare, në mënyrë që t'ia sigurojë vetes nënshkrimin e marrëveshjes finale me Serbinë. Mirëpo duke parë rrezikun e humbjes së mbështetjes nga opozita, i është drejtuar Gjykatës Kushtetuese për të marrë kinse mendimin për ligjshmërinë e ratifikimit të marrëveshjeve të nënshkruara, fillimisht me Daçiçin e së fundmi edhe me Vuçiçin në Bruksel. Nga dialogu i pabarabartë i Brukselit, përveç shtrirjes gjeografike të Serbisë në veri të vendit dhe kontrollit të plotë të enklavave serbe në brendi të vendit, Kosova rrezikon të dalë e zhveshur komplet nga identiteti shtetëror dhe ai kombëtar. Bërja hisedare e Serbisë në të gjitha asetet e shtetit dhe gjitha institucionet e Kosovës në njërën anë dhe dominimi ekonomik dhe politik i Serbisë në vendin tonë në anën tjetër, e ka shndërruar Republikën e Kosovës në shtet pa Republikë.

Të bashkuar në mendime, të ndarë në veprime

Në Kosovën e sotme, me secilin që flet veç e veç, askush nuk pajtohet me situatën e krijuar, mirëpo kur është në pyetje bashkërendimi i forcave (organizimi), të gjithë hezitojnë, sikur mungon vullneti dhe guximi qytetar për t'u përballur me sfidat e kohës!

Servilët dhe puthadorët e ndërkombëtarëve e kanë të garantuar pushtetin në gjysëm shtetin e Kosovës. Ndërsa atdhetarëve dhe mbrojtësve të sovranitetit dhe integritetit territorial të vendit u përgatiten sfida të mundimshme dhe të pakapërdishme për kohën dhe rrethanat në të cilat jetojmë. Në situatën e krijuar, për ndaljen e dialogut të pabarabartë me Serbinë në Bruksel dhe parandalimin e shumë të këqijave të tjera, kërkohet guxim e mençuri, tolerancë e bashkëpunim, qëndrueshmëri dhe konsistencë në veprime. Ekziston vetëm një zgjidhje; protestat dhe revolta e përgjithshme popullore, padëgjueshmëria qytetare ndaj institucioneve të korruptuara deri të bllokimi i tërësishëm i jetës institucionale. Ata që mendojnë të presin fundin e mandatit të kësaj qeverie, për përmbysjen e këtyre strukturave kriminale dhe korruptive me votë të "lirë", do të zhgënjehen akoma më keq, ngase deri atëherë, këta liderë të korruptuar, do ta rëndojnë akoma më shumë jetën e qytetarëve, do ta ngulfatin vullnetin e shumicës shqiptare, përmes dialogut të Brukselit, ku përveç Zajednicës do ta degradojnë akoma më tepër sovranitetin e shtetit me zgjerimin territorial dhe politik të Serbisë në Kosovë. Deri atëherë, këto struktura kriminale jo vetëm që nuk do të dobësohen, përkundrazi do të forcohen akoma më tepër, për çka edhe përballja me to do të jetë më e vështirë dhe më e mundimshme, ku pasojat do të jenë afatgjata dhe të paparashikueshme për qytetarët.

Në kohën kur nuk funksionon asnjë mekanizëm shtetëror për të mirën e qytetarëve, filluar nga Presidenca, qeveria dhe Parlamenti, protestat mbarëpopullore kanë mbetur e vetmja shpresë për mbrojtjen e shtetit nga dialogu vrastar i Brukselit në njërën anë dhe degradimi i institucioneve të shtetit nga uzurpatorët, puthadorët dhe lakmitarët e pushtetit në anën tjetër. Çdo ditë në pushtet e një presidenti kuisling dhe një qeverie kusarësh politikë, do të thotë një ditë më pak për shtetin dhe qytetarët e lodhur, që janë duke e pritur me padurim liberalizimin e vizave për largimin nga vendi i tyre.

Janë, pra me mijëra arsye pse duhet protestuar me 29 shtator, jo për të mbështetur VV-në, por për mbrojtur shtetin nga falimentimi dhe zhbërja fizike, për të rikthyer shpresat për jetë në Kosovë. Mos mbështetja e protestës së 29 shtatorit nga partia më e madhe opozitare (LDK), me arsyetimin se dëshiron t'i provoj edhe "dy mundësitë" demokratike në Kuvend, e shpërfaq edhe një herë mosbesimin ndaj VV-së dhe ndihmën në prapavijë që i bënë presidentit Thaçi. Kjo nuk ka si të kuptohet ndryshe, veçse një hipokrizi e radhës e lidershipit të LDK-së, kur në të njëjtën kohë e refuzon dhe kërkon mbështetjen e opozitës për mocion mosbesimi ndaj qeverisë Haradinaj, e kinse në rast të dështimit (të sigurtë) të mocionit, ta marrë ajo (LDK-ja) primatin e organizimit të protestës! Kjo i bie, që ka fare pak rëndësi çfarë bëhet në ndërkohë me shtetin, e rëndësishmja është të bëhet një hap drejt pushtetit qoftë edhe përmes marrëveshjeve në prapaskenë (si çdo herë me Hashim Thaçin), në këtë rast, në mbështetje të kërkesës së kryeparlamentarit Veseli nën sloganin në mashtrim: "Të gjithë kundër Serbisë"!

Shihet qartë, se LDK-ja nuk e ka vullnetin dhe as guximin për ta larguar Thaçin nga pushteti, shkaku i lidhjeve të interesit që kanë deputetët dhe strukturat e udhëheqjes aktuale. Pra, për aq sa është i dëmshëm vazhdimi i dialogut Thaçi-Vuçiç për Kosovën, aq do të jetë e dëmshme "ngjallja" e Isa Mustafës-nënshkruesit të dytë të marrëveshjes fatkeqe për Asociacionin e Komunave Serbe (AKS) me Vuçiçin në Bruksel. Në rast të mosdaljes masive të qytetarëve në protesta, do ta shfrytëzojë Thaçi si alibi për ta justifikuar mbështetjen e rrejshme nga opinioni i gjerë për korrigjim të kufijve (ndarjen e Kosovës) me Serbinë!

Ashtu siç më njohin lexuesit, në shkrimet e mia flas me gjuhën e zemrës, asnjëherë nuk udhëhiqem nga interesi, mëria dhe inatet personale, por nga dashuria që kam ndaj atdheut tim-Kosovës dhe bashkëkombasve që jetojnë në atë vend. Unë asnjëherë deri më sot, nuk e kam mbështetur keq-qeverisjen e vendit pavarësisht se kush ka qenë në pushtet, sikurse që nuk i kam mbështetur pazaret e pista politike për interesa personale të kujtdo qofshin ato. I tillë do të mbetëm deri në frymën e fundit-ushtarë besnik i atdheut tim.

Zoti e bekoftë Republikën e Kosovës, shtet sovran e demokratik!

Nga Florim ZEQA

 

/Agjensia e Lajmeve Sot News/

Na Beni Like Ne Facebook: 
Total votes: 7

Lajme nga e njejta kategori

Postuar: 16/12/2018 - 07:34

U hap kuvendi i PD-së në konfuzionin e kohës së sotme!

Postuar: 16/12/2018 - 07:33

Protesta e studentëve e ka kaluar dhjetë ditshin dhe mesa duket do të vazhdojë vijueshmëria e saj

Postuar: 16/12/2018 - 07:31

Në ekstazën e këtyre ditëve të protestës së studentëve, veçanërisht partitë opozitare, liderët e

Postuar: 16/12/2018 - 07:28

Pas akuzave të kryeministrit Rama se pedagogët (senatet) kanë qenë shtysa kryesore për qorollepsj

Postuar: 15/12/2018 - 07:22

U nisën në dhjetor 1990, 28 vite më parë protestat e famshme të rinisë studentore, të cilat ashtu

Postuar: 15/12/2018 - 07:20

 

Postuar: 15/12/2018 - 07:19

Kryetarja e LSI-së, Monika Kryemadhi mbetet shumë origjinale në përpjekjet për menaxhimin e prote