BREAKING NEWS

Gazetari plas akuzën “bombë” për Spartak Ngjelën ‘live’ në studio, Klodiana Lala i kthehet ashpër avokatit: Tërhiq fyerjen, do hetohesh për dosjen e bujshme

x

Opinion / Editorial

"Të mandatuarit" deri radhën tjetër të akuzave për vjedhje

I liruar (gjykatërisht apo ligjërisht) nga "akuzat" për lobimin rus dhe afera të tjera në këtë çështje, Lulzim Basha nuk vonon dhe ja shpërblen këtë nder "Rilindjes" duke filluar "tavolinën" për reformën zgjedhore! Ishte një "zgjuarsi" e madhe ajo e mospërfshirjes së Bashës në atë aferën e parave që shkojnë nga ruset deri në Amerikë dhe sigurisht përveç kësaj, ishte dhe një punë e paqme bashkëpunimi që Basha nga dikur mos njohje të Gjiknurit dhe sigurisht Hajdarit si "tradhëtare" mandatoi Bylykbashin dhe me sa duket fton dhe Vasilin në këtë mesele me reformë zgjedhore.

Kjo lloj tavoline për cilindo që njeh aktorët dhe faktorët, por që njeh mentalitetin e sidomos dy partive të mëdha, zakonet e partisë së tretë më të vogël dhe sigurisht afirmimin politik "modern" e opozitës brenda Kuvendit - është normalisht e dyshueshme dhe e pa besueshme. Por në shumë e shumë pjesë të politikës që janë kriminale, afera dhe korruptuara, kjo aferë e dyshuar dhe e pabesueshme ka "cilësinë"që të mos jetë në radhën e parë të neveritjes së bisedave, që zakonisht bëjnë tashmë prej tre dekadash të tillë politikanë që në fund të ditës nuk i bëjnë as për shoqërinë, as për demokracinë, por vetëm për pushtetin e tyre personal dhe lidershipeve tashmë prej vitesh e vitesh, majë tyre.

Absolutisht kjo është e qartë si drita e diellit por në fund të fundit "spektakli" vazhdon dhe është një delir në vete. Kodin Zgjedhor dhe formën se si veprohet për të dalë një deputet dhe përfaqësues i popullit shoqëria shqiptare nuk e do! Nuk e do, se e di se nuk është as demokratik dhe se është bërë me një marrëveshje tipike për sundim dhe krijuar parti të kryetarit dhe sundimtarit të radhës! Është bërë si besim i lidershipeve të molepsur dhe jo demokratike që nuk njohin demokraci të brendshme dhe kanë aferë si partinë dhe statutin e saj. Po pra tipikisht formë dhe mentalitet "doktor dhe piktor".

Por sot njeriu i jashtëzakonshëm i opozitës shqiptare ose Lulzim Basha thotë se nuk është ky problemi se sa "vjedhja e votave që bën PS-ja dhe Rama"! Prandaj në fakt mbasi doli i pastër me rusët, po ulet që të shikojnë përtej dhe jo te pika ku "kryetari i Partisë" vendos në listë kë ti dojë qejfi dhe mundësisht kush është më servil apo aferë e kryetarit, që pastaj demokracia të bëhet sistem kur populli nuk ka kurrfarë mënyre për të zgjedhur kë do dhe si do, por dhe kush e meriton. Sepse e para i është përcaktuar njeriu pa renditje të votave, por të kryetarit të partisë, i është bërë e pamundur të zgjedhë me sasi votash njeriun që bën të mundur përfaqësimin e qytetarit dhe - kaq! Asgjë më shumë, por Basha thotë se nuk është ky problemi, por vjedhja e votave nga Rama. Më falni, dikur ishte dhe Gjiknuri si në Peshkopi. Tani në tavolinë kemi vetëm një "socialist" ose njeriu i Rilindjes Gjiknuri, një demokrat si Bylykbashi, një demokrate e lënë (jo kaq kot) nga PD-ja brenda si Hajdari dhe një i LSI-së si Vasili për të bërë atë që nesër do të bëjë të mundur krijimin e një kohe përpara se të "mbarojnë zgjedhjet" e radhës me batutën e kahershme - u vodhën edhe kësaj radhe zgjedhjet. Nga vetë akuzat e njëra-tjetrës përballë, pra po vetes gjithçka aty është e pa besueshme, sepse aty gjenden të gjitha akuzat e njëri-tjetrit për shtrembërim dhe hajdutëri zgjedhjesh. Aty ke partinë që ka mësuar shqiptarët të vjedhë dhe grabisë zgjedhjet si ato të 26 majit 1996-të dhe në vazhdim dhe ke dhe përfaqësuesit e akuzuar për vjedhje zgjedhjesh në Peshkopi dhe Durrës herën e fundit. Pa u dënuar askush, pa u përgjigjur askush dhe pa e pësuar askush, as dje dhe as sot, por që tani duhen ulur deri në radhën tjetër që kush të humbë të akuzojë tjetrin se vodhi.

Kjo është sigurisht e vetmja lojë që ju ka mbestur atyre që nuk ju ka nisur akoma reforma në drejtësi tju veprojë. Si mund të besohet se një tavolinë e tillë bën reformë? Asnjë reformë dhe asnjë Kod të ri Zgjedhor nuk bëjnë të tillë endacakë deri në stacionin e ri të vjedhjeve dhe zgjedhjeve të prishura nga akuza dhe nga marrëzitë e përdorimit të lekëve pa numërim, të aferave pa numërim dhe militantëve në keqpërdorim. Të gjithë kanë dhënë prova që nuk bëjnë dot një palë zgjedhje sikur ti japësh kodin e aprovuar dhe nga "Zoti"?! Prapë dhe më të përsosurin do ta çmontojnë dhe përdorin si për vjedhje, për përfitim dhe për devijim të votës, apo dhe grabitje të saj, por dhe kur nuk ka asnjë vjedhje akuza është te dera, sepse sidomos PD-ja nuk është "mësuar" të pranojë njëherë të vetme humbjen. Të tillë tipa nuk bëjnë asgjë! Po sigurisht, pa nisur punën realisht akuza e SPAK dhe puna e BKH-së! Pa nisur e vërteta në drejtësi, asnjë reformë nuk mund të bëhet, sepse janë të paragjykuar dhe të fajësuar që në fillim, por dhe mjeshtra të aferave në bisedimet e bujshme deri në zgjedhjet e ardhshme, të cilat sigurisht do t’i bëjnë për faqe të zezë me firmat dhe vulat e tyre idiote dhe të shëmtuara në korrupsion.

Asnjë aty nuk është i besueshëm, sepse kanë akuzuar dhe stërpërgojuar njëri-tjetrin prej kohësh dhe akuzat janë për vepra penale. Prej këtyre njerëzve pritet që bëhen reformat?! Reforma zgjedhore është pothuaj në mos më shumë, e rëndësishme se sa ajo në drejtësi, por nuk mund të kryhet pa filluar punë drejtësia e re. Fjalët se është kusht i Bundestagut është vetëm një "diversiv" që të bëjnë ndonjë maskarallëk ( kur njerëzit mos ta kenë mendjen) të zakonshëm, që t’ia hedhin dhe një herë si ndërkombëtarëve dhe sigurisht shqiptarëve kush ka mbetur për ti besuar tipa-ve delirantë të tillë! Të mandatuarit deri radhën tjetër të akuzës për vjedhje, janë deliri i fundit dhe mashtrimi i fundit i radhës, por që nuk bëjnë dot reformë zgjedhore, sepse nuk e kanë as seriozisht dhe as sinqerisht. Janë deri për radhën tjetër.