Kërko Për

Agjencia e Lajmeve SOT NEWS

Agjencia e Lajmeve SOT NEWS Lajme nga Shqiperia, Kosova, Rajoni dhe Bota, Politike, Kronike, Aktualitet, Dossier, Kulture, Sport

Fatos Klosi: Grekët akte makabre ndaj shqiptarëve, po i bëjnë traditë vrasjet dhe akuzat, shumë politikanë në vend bëjnë garë për t’i pëlqyer Athinës

Postuar: 06/12/2018 - 10:20

 Ish-kryetari i Shërbimit Informativ Shtetëror, Fatos Klosi komentoi dje marrëdhëniet e tensionuara midis Shqipërisë dhe Greqisë. Gjatë një interviste për gazetën “SOT”, duke marrë shkas nga vrasjet e ditëve të fundit të shqiptarëve në Greqi, Klosi deklaroi se kjo sjellje është në traditën e keqe greke. Sipas tij, Greqia ka kryer akte makabre kundër shqiptarëve, ndërsa një frymë e tillë vijon për shkak të pretendimeve të tyre për territor. Klosi po ashtu u tregua i ashpër ndaj politikanëve shqiptarë, të cilët i quajti servilë të Greqisë që bëjnë garë se kush do t’i pëlqejë më shumë Athinës. Lidhur me debatin e krijuar pas dëmtimit të memorialit të nacionalistit grek, Thimio Loli, ish-kreu i SHISH theksoi se autoritetet nuk duhet të japin leje për ndërtimin e memorialëve për njerëzit që kanë luftuar kundër shqiptarëve. Në fund, ai komentoi edhe aktualitetin politik dhe pritshmëritë nga reforma në drejtësi me ngritjen e Këshillit të Lartë të Prokurorisë dhe Këshillit të Lartë Gjyqësor. 

-Brenda dy javësh janë vrarë katër shqiptarë në Greqi, shumica pa asnjë arsye. Si i shihni këto ngjarje? A po hakmerren grekët për ngjarjen në Bularat?

Nuk janë ndryshe grekët sot nga ata që kanë qenë gjithë kohën. Mbase këto ngjarje nuk mund t’i quajmë hakmarrje, por është një vazhdim i një tradite të keqe që sipas situatave, acarohet më shumë ose bëhet pak më e lehtë. Por në përgjithësi grekët kanë qenë jo-dashamirës me shqiptarët. Kemi në historinë tonë plot raste, ku grekët, sigurisht me qëllime në ato raste, kanë kryer akte makabre. Këto të sotshmet janë më të thjeshta si ngjarje, por sigurisht janë po aq të rënda. Unë nuk do t’i quaja hakmarrje, por një traditë e keqe e popullit grek nga shqiptarëve. Indicien për të tilla veprime ata e kanë marrë gjithmonë nga pretendimet e tyre, d.m.th atje bëhet një propagandë normale që Greqia ka akoma toka për të marrë nga fqinjët, që e kanë ngushtuar shumë territorin e saj. Pra, ekziston një farë nacionalizmi i hershëm që vazhdon të propagandohet dhe nuk ka kaluar pa pasoja as në brezin e ri, as tek njerëzit e vonë, edhe pse e dinë që në Evropë janë sqaruar këto situata dhe janë bërë edhe marrëveshje për mos-prekje kufijsh. Në Greqi vazhdohet akoma. Nuk thonë kot historianët që Greqia që pas pavarësisë së saj e ka trefishuar territorin e saj dhe sigurisht e ka marrë nga fqinjët sepse këtu bëhet fjalë për kufijtë veriorë të Greqisë. Unë nuk çuditem nga kjo sjellje e grekëve e që ata mbajnë prej kohësh qëndrime të tilla.

-Pse marrëdhëniet Shqipëri-Greqi janë prej kohësh kaq të tensionuara? Apo kjo tregon që grekët iu tremben shqiptarëve?

Marrëdhëniet e tensionuara janë për shkak të një eksperience të vjetër të marrëdhënieve midis grekëve dhe shqiptarëve. Ne përpiqemi të themi jemi popuj vëllezër, po historia ka treguar që grekët gjithmonë kanë patur një qëndrim të ashpër kundër shqiptarëve, pretendime pafund territoriale, pretendime kulturore pafund. Por, nuk mund të them se grekët janë të frikësuar nga shqiptarët. Nuk besoj se është problem frikësimi. Është popull më i madh, më i pasur, ka shtet më të konsoliduar kështu që nuk ka asnjë faktor që ata ta ndjejnë veten të dobët, aq më shumë që ushtarakisht janë goxha më të fuqishëm, harxhojnë shumë më tepër. Natyrisht është faktori turk që i ka bërë të tillë, jo shqiptarët, bullgarët ose maqedonasit, por edhe pse me turqit vijojnë fërkimet dhe acarimet e vjetra edhe për ishuj të pabanuar, grekët janë një vend i përgatitur për çdo situatë. Boll të kujtojmë këtu luftën italo-greke, një vend i madh si Italia, teknologjikisht më i avancuar, etj, pësoi disfatë më grekët. Pra, nga kjo pikëpamje ata e kanë treguar që kur bëhet fjalë për Greqinë, për territorin, për ato faktorë që përcaktojnë patriotizmin ose nacionalizmin, bëhen një.

-Ndryshe nga sa ndodhi me ngjarjen në Bularat, ku pati reagime të shumta dhe madje edhe protesta nga grekët, reagimet në Tiranë për ngjarjet e ditëve të fundit kanë qenë të vakëta. Si shpjegohet një qëndrim i tillë? Po faktin që shqiptarët duken të përbuzur e të dhunuar nga pala greke, si e komentoni?

Asnjëherë nuk kemi qenë aq të organizuar sa të mobilizohemi dhe të kërkojmë llogari as ndaj grekëve, as ndaj serbëve. Por sidomos ndaj grekëve. Tek e tek mbase shqiptari është edhe më i egër se greku dhe dallohet për diçka të tillë, por problemi është që të tilla aktivitete kërkojnë organizim. Për shembull ajo që ndodhi në varrimin e minoritarit grek të vrarë, kërkonte organizim. Erdhën shumë njerëz dhe shumë autobusë, pra nuk bëhet vetë, kërkohet organizim. Megjithatë mund ta pranojmë që grekët e kanë një dell luftarak. Por në Shqipëri nuk e bëjnë këtë gjë, nuk e ka bërë kurrkush asnjë herë. Mungon organizimi, meqenëse mungon edhe fryma nacionaliste. Nëse do të kishte frymë, do të vinte edhe organizimi, por nuk ndihet në Shqipëri një frymë e tillë. Nga mos-reagimi i shqiptarëve më pas vjen edhe sjellja e egër e grekëve.

-A do të ndikojnë këto ngjarje tek çështjet e lëna pezull Shqipëri-Greqi dhe tek negociatat që po bëhen midis dy vendeve për të arritur një marrëveshje?

Jo, nuk mendoj kështu. Çështjet e lëna pezull lidhen më shumë me faktorin votë, me faktorin çfarë do të thonë njerëzit, si do ta presin njerëzit, nuk lidhen me gjëra të tilla. Të gjithë politikanët, edhe andej, edhe këtej do të donin që t’i zgjidhnin këto gjëra, duke i quajtur pastaj suksese të tyre, suksese të politikës së tyre, etj. Mirëpo, duhet lëshuar pe nga të dyja palët për gjërat që janë të diskutueshme. Deri tani kemi qenë servilë më shumë sesa dashamirës për të arritur rezultate. E kam bindje këtë që të gjithë politikanët shqiptarë, gjatë gjithë kësaj periudhe tranzicioni kanë patur një farë servilizmi po them në një formë të butë, për të mos thënë edhe nënshtrim ose një dëshirë për të marrë fjalë të mira nga Athina. Kështu që nuk është e kollajtë.

-U bë goxha kohë që përflitet marrëveshja Shqipëri-Greqi dhe finalizimin e saj, por ende nuk kemi diçka konkrete. Pse mendoni se po vjen kjo vonesë?

Marrëveshja është një marrëveshje që nuk është bërë për dekada, dhe nuk është bërë jo se nuk kanë dashur. Marrëveshja sigurisht që është një marrëveshje e vështirë, është një kompromis i vështirë sepse duhet bërë kompromis sigurisht. Në çdo bisedim kërkohet një kompromis. Tani sa i madh është ky kompromis, deri ku lejohet të lëshosh pe, deri ku të dëgjojnë për pretendimet që ke, kjo varet pastaj nga situatat. Grekët kam përshtypjen nuk do të bënin dot lëshime, atje opinioni publik është më i ndjeshëm sesa ky i joni. Për këtë gjëra është fryrë ky problem pafund, kështu që politikanët grekë të çdo lloj ngjyre që kanë qenë, pak a shumë kanë mbajtur të njëjtin qëndrim. Gjithë problemi është nga ne kush do të luftojë deri në fund që të mos bëhen lëshime të paarsyeshme. E theksova edhe më lart që për sa kohë do të duhet një kompromis, punohet për një marrëveshje, lëshime do të bëhen jo këtu e jo diku tjetër, do të duhet të gjendet gjuha e përbashkët. Por çdo gjë duhet me masë dhe më karar. Nuk do të uroja që për të mbyllur shpejt bisedimet e për ta pasur sa më parë një marrëveshje në tavolinë, të tejkalohet masa. Nuk besoj se ka ndonjë gjë për tu shqetësuar tek vonesa e marrëveshjes. Tani po ngulet këmbë, por duhet të kujtojmë që kanë kaluar dhjetëvjeçarë të tërë dhe nuk është bërë dot. Madje sa më shumë të zgjatet, unë besoj aq më e mirë do të jetë marrëveshja. Sepse në këtë mënyrë ju jep mundësi të dyja palëve ta pleqërojnë mirë e mirë, të kuptohen më mirë me njëra-tjetrën. Do të kenë mundësi të argumentojnë dhe diskutojnë për çdo detaj, si u tha në filan vit, si u tha në këtë vitin tjetër, çfarë u tha atëherë e çfarë u bë. Gjërat e ngutura sigurisht do të pasohen nga shumë vërejtje dhe nga shumë diskutime, qoftë në Greqi, qoftë edhe në palën shqiptare. Dëgjova dje që një politikan grek kishte thënë që me largimin e Nikos Kotzias diskutimet kanë mbetur pezull. Por unë do të thosha që diçka e tillë të jetë ndikuese. E them këtë sepse dihet që Alexis Tsipras është autoritar dhe nuk besoj se njerëz të veçantë do të ndikojnë kaq shumë. Ata kanë influencën e tyre, por jo për gjëra kaq madhore. Një marrëveshje e tillë është e rëndësishme qoftë për Greqinë, ashtu edhe për Shqipërinë. Përcaktimi përfundimtar i kufirit të mbetur pezull sigurisht është një fakt i rëndësishëm dhe një çështje madhore që do të mbetet në histori. Nganjëherë njerëzit edhe pa ditur diçka, por thjesht duke dëgjuar se çfarë thuhet në media, si trajtohet nga analistët, historianët, etj, bëhen shumë të ndjeshëm për gjëra që as nuk i dinë fare dhe as nuk i kuptojnë dot. Kështu që edhe ky faktor merret parasysh, në fund të fundit të gjithë politikanët sot e dinë që pas pak kohësh do të kenë zgjedhje dhe natyrisht këto gjëra për të cilat njerëzit janë të ndjeshëm kanë influencën e tyre edhe në këtë proces.

-Një tjetër ngjarje që shkaktoi debat dhe reagime është edhe thyerja e memorialit të nacionalistit grek, Thimio Loli. Organizata OMONIA e mori në mbrojtje nacionalistin grek duke e cilësuar si hero, në një kohë kur ai njihet si një person që ka luftuar kundër shqiptarëve. Si e shikoni faktin që në vendin tonë u ngrihen memorialë njerëzve kundërshtar të shqiptarëve, ndërsa pala greke nuk e lejon kurrsesi diçka të tillë?

Unë problemin e shikoj që tek leja që jepet për të ngritur këto memorialë. Atij le t’ia ngrenë sa të madh të duan memorialin në Greqi, në Greqi ata mund të bëjnë ç’të duan me nacionalistët grekë. Në territorin shqiptar kur ai ka luftuar kundër shqiptarëve, kur ai ka luftuar kundër shtetit shqiptar që ka qenë pjesë e atyre që kanë bërë mizori të shumta, është absurde të jepen leje për të ndërtuar memorialë. Sigurisht pastaj kur një memorial nuk është në vendin e duhur, sapo acarohet pak situata, ato lloj memorialësh e pësojnë të parët. Kështu që nuk çuditem. Nuk është se kur janë ngritur memorialët janë pyetur, është bërë debat, nuk kam dëgjuar historianët të flasin për këto çështje. Por tani që ndodhin të tilla gjëra, dalin ata edhe thonë që prit se ai ka qenë i tillë, ka bërë kështu, i ka ndodhur kështu, etj. Edhe unë vetë shumë vonë e mora vesh se kush ishte dhe çfarë përfaqësonte dhe e para gjë që më vajti mendja është “Leja pse është dhënë?” Po të mos ishte dhënë leja, nuk do ta kishim këtë problem sot. Ndërkohë nga ana tjetër, pala greke është shumë e prerë për këto gjëra, nuk lejon të tilla gjëra në territorin e saj. Atje nuk bën garë kurrkush që t’i pëlqejë Tiranës, që me veprat e tyre t’i pëlqejnë Tiranës. Këtu tek ne e kanë bërë të gjithë këtë garë, plot politikanë. Prandaj edhe ne ndodhemi në këto situata të vështira, dhe me vrap bëhen varrime madhështore, pretendohet të vihen edhe përmendore. Vriten përditë shqiptarë në Greqi dhe jo reagime zyrtare që nuk ka, por edhe kur ka janë fare të zbehta, por edhe nga qytetarët nuk ka reagim. Secili shikon punën e tij, nuk e trajton njeri, thonë çdo gjë për tu shfajësuar, për ta kaluar ngjarjen.

-Për të prekur pak edhe politikën, si e shihni faktin që opozita vijon të jetë jashtë Parlamentit, pavarësisht se është e bërë e qartë që një gjë e tillë dëmton hapjen e negociatave dhe ndërkombëtarët kanë bërë thirrje të ndërpritet?

Nuk habitem aspak. Të dyja palët e kanë aplikuar një diçka të tillë. Unë them e kanë përdorur në ato periudha kur nuk kanë patur çfarë të thoshin, nuk janë të përgatitur për të patur përballje politike në Parlament. Edhe pse kanë shumë eksperiencë, në Parlament ne kemi parë çudira, gjëra që janë fare të papëlqyeshme. Por që të ishte Parlamenti ashtu siç duhet, që të kishte debat serioz për çdo vendim, për ligjet, etj, duhet që opozita të dalë me gjëra konkrete dhe propozime konkrete. Nëse një diçka e ka propozuar qeveria, opozita domosdo do ta kundërshtojë. Por kjo është absurde, nuk kam dëgjuar një herë që ata të thonë “Po”. Nuk po them vetëm për këtë opozitë, por për të gjitha. Asnjë opozitë nuk ka qenë e gatshme të thotë “Po, kjo gjë është e mirë, po vjen në kohën e duhur. Por nga ana tjetër, ne kemi këtë vendim që ky nen të zbutet, të forcohet, etj.” Pra nuk ka seriozitet, debati nuk është serioz. Njerëzit nuk vijnë me argumente, këto gjëra nuk kanë ndodhur. Ata i zgjidhin këto gjëra me bojkot, e zgjedhin politikën e bojkotit si politikën e të bërit politikë, por për mua kjo është një mënyrë për t’iu shmangur përgjegjësisë. Natyrisht punët më të ngatërruara bëhen nëpër komisione, atje ku ka edhe debat të vërteë, por edhe në seancat plenare të cilat populli ka mundësi t’i shohë drejtpërdrejt, duhet të ketë debat konstruktiv. Në këtë mënyrë populli mund të shohë dhe vlerësojë edhe ata persona që mburren për merita të mëdha ndaj këtij vendi, ka mundësi t’i shohë se çfarë thonë, si artikulohen. Kjo kërkon impenjim, kërkon përgatitje, kërkon kohë që ta bësh tamam.

-Deklaratat e kryetares së LSI, Monika Kryemadhi e cila vlerëson punën e kryebashkiakut Erion Veliaj kanë ngjallur shumë reagime në radhët e PD dhe LSI. A mendoni se kemi të bëjmë me një flirt të Veliajt me LSI apo këto deklarata janë thjesht një diversion politik?

Unë e quaj më shumë diversion meqenëse po diskutohen shumë. Disa njerëz hiqen sikur dinë, sikur janë afër njerëzve që marrin vendime, por kjo konkretisht me duket një diversion politik.

-Në datat 11 dhe 12 dhjetor do të hidhet hapi final për ngritjen e Këshillit të Lartë të Prokurorisë dhe Këshillit të Lartë Gjyqësor. A prisni ju që viti i ardhshëm të sjellë rezultatet e pritshme të reformës në drejtësi kundër korrupsionit?

Unë uroj dhe shpresoj që të bëhen këto gjëra. Por të thuash që vitin tjetër do të shohim rezultatet e luftës kundër korrupsionit, rezultatet e pritshme të reformës në drejtësi, kjo është shumë e vështirë. Korrupsioni është një fenomen, një dukuri që ka prekur edhe qelizat më të vogla të njerëzve. Nuk është një fenomen i vogël, prandaj edhe nuk bën shumë përshtypje. Më së shumti konsiderohet si një përplasje apo akuzë politike, ku politikanët e përdorin si shprehje për të sharë njëri-tjetrin. Ata thonë vazhdimisht jo është bërë atëherë kur keni qenë ju, jo atëherë s’ka patur korrupsioni, por tani është bërë shumë galopant, etj. Kështu që më duket shumë e vështirë që ky mentalitet që është krijuar deri tani, është nevojë e domosdoshme, por përveç marrjes së vendimeve zyrtare, ngritjes së ekipeve të nevojshme, etj, kërkohet edhe një ndryshim në mentalitetin dhe mendësinë e njerëzve. Ata duhet të mësohen. Një gjë e tillë nuk bëhet as me urdhër, as me ligje. Kjo kërkon kohën e saj. Edhe vendet e tjera më të zhvilluara dhe më të vjetra se ne nuk e kanë pasur kollaj dhe vazhdojnë akoma të luftojnë me korrupsionin. Është një fenomen vërtetë shumë i ngatërruar sepse gjërat më të rënda nuk bëhen duke lënë gjurmë nëpër letra me qëllim që pastaj t’i kapësh kollaj dhe t’i vësh prangat. Është një shprehje shumë e bukur: Di të vjedhësh? Di. Di të fshehësh? Nuk di. Lëre mos vidh atëherë. Pra është fshehja një proces shumë i rëndësishëm gjatë vjedhjes. Kështu që ata që bëjnë korrupsion vërtetë, me siguri janë mjeshtra në fshehje. Dhe kjo sigurisht nuk e bën të lehtë. Prandaj duhet të krijohet një frymë e përgjithshme në popull, në administratën shtetërore, në parti, gjithandej. Nuk bëhet vetëm duke ngritur disa komisione. Natyrisht ata janë të domosdoshëm, po të mos jenë ata pastaj lufta tjetër shkon dëm po nuk vajti puna te arrestimet, por unë them që është ende herët të pretendojmë. Sigurisht gjëra konkrete do të ketë, dikush që ka gabuar dhe nuk i ka bërë gjërat tamam, do të bjerë në rrjetë. Por që të themi që korrupsioni po luftohet, i është mbyllur porta aq shpejt, më duket e vështirë. Është një nga fenomenet më të vështirë. Unë e shoh sa galopant është. Në çdo hap, bie ndesh me korrupsionin.

-A ka politikanë shqiptarë që i tremben apo që rrezikohen nga SPAK dhe BKH?

Unë them që janë dhe duhet të jenë. Të gjithë duhet të jenë të rrezikuar dhe të frikësuar sepse korrupsioni është një frymë kombëtare. Nuk e bëjnë dot politikanët këtë punë të vetëm po të mos jetë kjo frymë, po të mos jetë kjo tolerancë. Prandaj them që kërkohet koha e nevojshme që korrupsionit t’i mbyllet dera në të gjitha sferat. Në fushën juridike ku të ketë ligje dhe të ketë frymë për t’i zbatuar, në fushën e administratës, etj.

Intervistoi: Mimoza IBRA

/Agjensia e Lajmeve Sot News/

Na Beni Like Ne Facebook: 
Total votes: 6

Lajme nga e njejta kategori

Postuar: 10/12/2018 - 19:49

Deputeti i Partisë Demokratike, Luciano Boci, ka publikuar sot në Facebook-un e tij mesazhe që i janë dërguar mësuesve për të bërë komente pozitive në ftesën që Rama i bënte studentëve për dialog.Ai shkruan se “

Postuar: 10/12/2018 - 19:25

Me anë të një postimi në rrjetet sociale deputetja e Partisë Demokratike, njëherësh e bija e lide

Postuar: 10/12/2018 - 19:10

Ambasada Amerikane në Tiranë vjen me një mesazh të qartë për sistemin gjyqësor në vend.

Postuar: 10/12/2018 - 19:08

Për deputetin e Partisë Socialiste, Erjon Braçe, të gjitha kërkesat e studentëve janë tashmë të t

Postuar: 10/12/2018 - 18:59

Kryeministri Edi Rama  ka publikuar një foto në të cilën bëhet thirrje që ditën e nesërme të

Postuar: 10/12/2018 - 18:30

Kryeministri Edi Rama u ka dërguar sërish një mesazh studentëve.

Postuar: 10/12/2018 - 18:11

Kreu i Grupit Parlamentar të LSI-së, thotë se Rama do të përfundojë në burg.