128 zyrtarë të lartë drejt ndjekjes penale pas fshehën pasuritë, ILDKP zbardh listën e personave që pritet të përfundojnë në SPAK

Gjatë vitit 2022, plot 128 zyrtarë kanë fshehur pasuritë. Çdo vit, deputetë, ministra, kryetarë bashkish dhe një sërë kategorish të tjera duhet që të bëjnë deklarimin vjetor pranë ILDKP se si ka ndryshuar pasuria e tyre. Në raportin vjetor të Inspektoratit të Lartë të Deklarimit, Kontrollit të Pasurive dhe Konfliktit të Interesit për vitin 2022, i cili u paraqit ditën e djeshme në Komisionin parlamentar të Ligjeve, u dhanë detaje nga puna e këtij institucioni. ILDKP ka aplikuar gjithsej 128 sanksione, masë administrative me “gjobë”, për mosdeklarim të interesave private, konfliktit të interesave, si dhe për shkelje të ligjit “Për sinjalizimin dhe mbrojtjen e sinjalizuesve”, i ndryshuar. Mes tyre janë deputetë, kryetarë bashkish, gjyqtarë dhe Prokurorë. Por duke qenë se deputetë dhe krerët e bashkive janë kompetencë e SPAK, ata janë të rrezikuar nga Prokuroria e Posaçme. Nëse nisin hetimet gjithçka do të jetë në dorë të SPAK. Do të jetë Struktura e Posaçme Antikorrupsion pritet që të shkundë nga themelet kalanë e korrupsionit në Shqipëri. Politikanë, drejtorë administrate, gjyqtarë, prokurorë dhe funksionarë të tjerë të ndryshëm janë zhytur në korrupsion dhe të gjithë ia kanë hedhur paq. Por shpresat janë se diçka do ndryshojë përmes SPAK dhe BKH.

Ja çfarë ndodhi në Komisionin parlamentar të Ligjeve

Nga ana tjetër, Inspektorja e lartë e Inspektoratit të Lartë të Deklarimit dhe Kontrollit të Pasurive dhe Konfliktit të Interesit, Evgjeni Bashari deklaroi se ILDKPKI përgjatë vitit 2022 ka vijuar mbështetjen e procesit të rivlerësimit kalimtar të gjyqtarëve dhe prokurorëve, duke bashkëpunuar me organet e rivlerësimit në adresimin e kërkesave për vënie në dispozicion të dokumentacioneve për subjektet që po i nënshtrohen këtij procesi. “Konkretisht, gjatë kësaj periudhe janë trajtuar në total 63 kërkesa për dhënien e informacionit dhe dokumentacionit, brenda afateve të përcaktuara nga këto organe, si dhe 1 kërkesë nga Operacioni Ndërkombëtar i Monitorimit”, bëri të ditur Bashari. Gjithashtu, tha ajo, Inspektorati i Lartë në përmbushje të detyrimeve ligjore, si dhe rekomandimit të Kuvendit të Shqipërisë për të pasur prioritet të punës verifikimin e kandidatëve në organet e ndryshme të sistemit të drejtësisë, ka vijuar edhe përgjatë periudhës raportuese ushtrimin e kontrolleve të deklaratave të pasurisë për kandidatët në institucionet e sistemit të drejtësisë. “U morën të gjitha masat e nevojshme për të përfunduar në një kohë sa më të shkurtër verifikimet për 264 kandidatë për përfundimin e kontrollit të plotë për kandidatë për gjyqtarë në Gjykatën Kushtetuese, në Gjykatën e Lartë, Gjykatën e Apelit, Magjistratë, etj. Sipas Basharit, Inspektorati i Lartë mori të gjitha masat institucionale për funksionimin e plotë të sistemit elektronik të deklarimit të interesave private, ku në zbatim të dispozitave ligjore, si dhe në bashkëpunim të ngushtë me Këshillin e Evropës, hartoi dhe miratoi aktet e nevojshme nënligjore dhe formularët e deklarimit për sistemin elektronik. “Inspektorati i Lartë, në bashkëpunim të ngushtë me Këshillin e Evropës, gjatë periudhës raportuese zhvilloi aktivitete trajnuese për Autoritetet Përgjegjëse pranë institucioneve publike, ku u trajnuan mbi 310 përfaqësues të autoriteteve përgjegjëse, si dhe u garantua asistencë për më shumë se 2000 subjekte deklaruese”, tha ajo.