26 vjet nga zgjedhjet e ’96, flet ish-ministri i Mbrojtjes Shaqir Vukaj: Berisha kërkoi të armatosej PD pas kryengritjes së Vlorës”, Shaban Memia krijoi grupe mercenarësh

Ish-ministri i Mbrojtjes në qeverinë e Pajtimit Kombëtar, Shaqir Vukaj, është rikthyer pas në kohë në ngjarjet e 26 majit të vitit 1996. Teksa ishte i ftuar dje në një studio televizive, Vukaj theksoi se i ka parë vetë dokumentet që flisnin për një sulm në jug. Ai thotë se ishte vetë zv.kryeminsitri i asaj kohe Bashkim Kopliku, që më vonë ka treguar se presidenti i asaj kohe, Sali Berisha kishte dhënë urdhër për armatosjen e PD. Ai tha se rezervistët duhet të jenë të pranishëm në çdo periudhë historike sepse kurrë nuk i dihej se çdo të sillte e ardhmja. “Kam parë dokumentet që lidhen me mobilizimin e rezervistëve për t’i dërguar në jug. Por Bashkim Kopliku që ishte zv/kryeministër në një intervistë ka deklaruar që erdhi presidenti dhe na tha të armatoset PD. Këta persona që armatoseshin ishin të ashtuquajturit rezervistë edhe pse nga viti ’92 gjoja nën parullat e mohimit të çdo gjëje që kishte lënë komunizmi nuk është marrë askush me rezervistët edhe pse ata janë një forcë e jashtëzakonshme në momente të jashtëzakonshme. Janë të nevojshëm”, u shpreh Vukaj. Më tej ai tregoi se edhe pse në kah të kundërt politik kishte pasur një marrëdhënia shumë të mirë me Shaban Meminë dhe ai e kishte çuar të takonte grupin e armatosur që mbante fshehtas pas vetes. Vukaj tregoi edhe se një oficer i tij kërkonte ta vriste Meminë sepse frikësohej për djalin e porsa lindur dhe fatin që do të kishte nëse atë e përjashtonin nga Akademia Ushtarake. “Shaban Memia është ideologu i këtyre trupave që thirreshin. Sa vinin në Tiranë i sillnin në Akademinë Ushtarake sepse ishte bosh, ushtarakët i kishin nisur në Burrel e një pjesë nëpër shtëpi. Memia kërkoi të më takojë dhe më tha se një oficer i imi kërkonte ta vriste. I thashë me shaka të mos shqetësohej se do e zgjidhja unë atë punë. E pyeta nëse ishte e vërtetë se kishte një grupim të armatosur në rrethet e Tiranës dhe më tha që po, e pranoi”, nënvizoi Vukaj.