34-vjeçarja i dha fund jetës duke u hedhur nga pallati bashkë me foshnjën, Bujar Leskaj jep mesazhin e fortë: Një vdekje e paralajmëruar!

Një ngjarje tragjike është shënuar mesditën e sotme në lagjen “Pavarësia” në Vlorë. Një grua 34-vjeçe u hodh së bashku me fëmijën nga kati i pestë i pallatit ku jetonte. Fatkeqësisht pavarësisht ndërhyrjes së shpejtë të banorëve për t’u ardhur në ndihmë, nëna dhe fëmija ndërruan jetë.

Lidhur me këtë ngjarje tragjike ka reaguar dhe deputeti i Partisë Demokratike Bujar Leskaj.

Ai e quan këtë një vdekje të paralajmëruar. Sipas tij, “qeveria e projekteve 3D, modelin e surrogatove televizive pëlqen, sepse kështu i do Shqipërinë e shqiptarët, me halle, probleme, pa shtyllë kurrizore e të nënshtruar që t'i sundojë.”

REAGIMI I PLOTË

Një vdekje e paralajmëruar!

Në një shoqëri që “çmendet” për formate të tipit “Përputhen”, "Big Brother", "Love Story" e dhjetëra programeve televizive vanitoze e pa vlera, nuk ka njeri nge, kohë e dëshirë të ngrejë institucione që t’u vijnë në ndihmë njerëzve. Viktima e radhës, një nënë e re nga qyteti ynë, e cila ende shumë e re, e mposhtur nga hallet, mori në qafë edhe krijesën e vet engjëllore e të pafajshme.

Dhe të gjithë, ndoshta e dinin hallin e saj, por askush nuk i shkoi në ndihmë, pavarësisht se mjetet e mënyrat ekzistojnë.

Por qeveria e projekteve 3D, modelin e surrogatove televizive pëlqen, sepse kështu i do Shqipërinë e shqiptarët, me halle, probleme, pa shtyllë kurrizore e të nënshtruar që t'i sundojë.

Ndiej keqardhje e trishtim të thellë, por edhe një ndjenjë të fortë faji e përgjegjësie për këtë rast tragjik.

Që bëhet edhe më tragjik për faktin se ndodhi në Vlorë, por edhe se ndodhi pikërisht në Ditët e Ndërgjegjësimit për Luftën kundër Dhunës ndaj Grave.