34-vjetori i martirizimit të Havzi Nelës, Berisha sulmon ashpër Ramën: Dëno krimin mizor të babait xhelat, kërkoji ndjesë familjes

34 vite më parë në qendër të Kukësit u ekzekutua me varje, poeti Havzi Nela duke shënjuar edhe veprën e fundit kriminale të sistemit komunist në rënie. Poeti disident i Kukësit u kujtua dje nga familjarët e tij e përfaqësues të Partisë Demokratike, të cilët vendosën kurora lulesh në monumentin e heroit antikomunist. 34 vjetori i ekzekutimit të Havzi Nelës u përkujtua edhe nga politika shqiptare.  Ish-kryeministri Sali Berisha ka sulmuar ashpër kreun e qeverisë Edi Rama. Ai thotë se Havzi Nela u vra për fjalën e lirë, duke akuzuar se ekzekutimi i tij është firmosur nga Ramiz Alia dhe Kristaq Rama, babai i Edi Ramës. Ndërsa shton se Rama sot duhet të kërkojë falje. "Sot mbarë kombi shqiptar përulet me nderimin më të madh para kujtimit dhe veprës së pavdekshme të martirit të lirisë, poetit disident, heroit të fjalës, Havzi Nela, i cili 34 vjet më parë u var për fjalën e lirë për vargjet e tij në sheshin kryesor të qytetit të Kukësit me firmën e xhelatëve të diktaturës staliniste Ramiz Alia dhe Kristaq Rama, babai bilogjik i Edi Ramës", shkruan Berisha. Duke e konsideruar si një prej figurave më të shquara të letërsisë shqiptare, Berisha tha se Nela ishte dëshmia e gjallë se pse Enver Hoxha konsiderohej Hitleri shqiptar. Sipas Berishës, dy ishin arsyet se pse Hoxha mori një pseudonim të tillë dhe këto ishin qëndrimet që diktatori mbajti ndaj fjalës së lirë dhe opozitës. Havzi Nela është dëshmi e fundit mbasi ai u var si sot 34 vite më parë në sheshin qendror të qytetit të Kukësit, dëshmi kryesore se Enver Hoxha ishte një Hitler i vërtetë të pasluftës së dytë botërore. Kam qenë në hapat e mi të parë në politikë kur i ftuar mirrja pjesë në një kongres të Partive Demokratike të Evropës, gjithsej 4 muaj pas themelimit të opozitës këtu. Në atë kongres më dhanë fjalën dhe mbajtja një fjalë. Në deklaratën e atij kongresi ku ishte Theçeri, Zhak Shirak dhe personalitet më të spikatura të kohës, e cilësojnë Enver Hoxhën si hitlerin shqiptar të pas Luftës së Dytë Botërore”, tha ndër të tjera Berisha.