"A ka ish kryeministri një axhendë personale?"/ Ish ministri i LSI 'kalon' drejt të djathtës? Manjani zbardh prapaskenat: Foltorja e Berishës, ristart i PD

Me anë të një postimi në rrjetin social, ish ministri i Drejtësisë, Ylli Manjani, ka reaguar në lidhje me foltoren e ish kryeministrit Sali Berisha. Manjani e ka quajtur si një ristart për demokraci brenda Partisë Demokratike.

Manjani deklaron se aktualisht, PD është në situatën kur po rrokulliset me motorë të fikur, ndërsa shton se është pikërisht Berisha ai që do rindezë këta motorrë për një PD më demokratike.

“PD po rrokulliset me motorë të fikur. Ndaj duhet ndezur motori. Nuk është motor i dëmtuar, por thjesht i vjedhin naftën, ndaj dhe nuk ndizet. Berisha po e rindez dhe kjo është gjë e mirë. Rindezja e PD mund të shërbente shumë për ristartin e demokracisë në vend. Se motorfikurit, jo vetëm të PD, e kanë dëmtuar rëndë demokracinë, zgjedhjet, fjalën, lirinë, ekonominë, shoqërinë e shtetin.

Sigurisht nuk pres që Berisha t’i rindezë të gjitha këto, por një PD demokratike mund të ndihmonte shumë. E kuptoj ngarkesën që njerëzit kanë me emrin dhe figurën e Tij dhe kanë të drejtë, por kjo lëvizje e tij bën veç mirë.

A ka Berisha një axhendë personale? Ndoshta ka. Por personalja e një 77- vjeçari është shumë më e gëlltitshme sesa egoja e një 47 apo 57-vjeçari që s’ngopet me sundim antidemokratik.  Megjithatë, uroj të jetë ristart, jo rikthim. Shoqëria ka nevojë për ristart demokratik, politik, ekonomik e institucional”, shkruan Manjani.