A keni fakte që vila 760 mijë euroshe i përket një deputeti të PD-së? Gazment Bardhi ka një kërkesë për Tritan Shehun: Përgjigju edhe për akuzat e Halim Kosovës

I ftuar në emisionin “Radari Informativ”, deputeti demokrat Gazment Bardhi foli për përplasjen e tij dhe Edmond Spahos dhe Tritan Shehut në seancën e kaluar të Kuvendit.

Shkak për këtë përplasje ishte përmendja e një vile luksoze në Lalz, për të cilin Bardhi tha se i përket një anëtari të Rithemelimit.

Bardhi foli në “radari Informativ” edhe për thirrjen e Tritan Shehut, që nëse ka prova duhet të shkojë në prokurori, në të kundërt duhet të merret si i pandehur për fshehje krimi.

Lidhur me këto deklarata të Shehut, Bardhi i ka kujtuar kolegut të tij akuzat e bëra nga Halim Kosova gjatë kohës që ishte Ministër Shëndetësie, i cili akuzonte Shehun se i kishte ndërhyrë në një tender me vlerë 100 mijë euro, por që kërkonte t’ia jepte dikujt tjetër për 600 mijë euro.

Pjesë nga diskutimi:

Xhokaxhi: Nëse kjo vilë ekziston në emër të dikujt tjetër, si e vërtetuat ju që i takon një anëtari të Rithemelimit?

Bardhi: Së pari unë çfarë kam patur për të thënë e kam thënë. Kam dëgjuar një koleg që do duhet të më thërrasë, prokuroria, jam i gatshëm të shkoj. Halim Kosova ka akuzuar Tritan Shehun që zoti Shehu i ka ndërhyrë që një tender që ka kushtuar 100 mijë euro t’ia jepte një tjetri për 600 mijë euro. Do të doja që të njëjtin qëndrim zoti Shehu të kishte dhe për këtë akuzë.

Xhokaxhi: A keni fakte që kjo vilë i takon një deputeti demokrat?

Bardhi: Vila i përket kolegut tim në bashkëpronësi me dikë tjetër. Për shkak të detyrës time si Sekretar i PD kam më shumë informacione se çdo tjetër.