Afera “Partizani”, Berisha refuzon sërish të paraqitet në SPAK dhe strehohet në Kuvend, ish-kryeministri sulmon Arben Krajën dhe Irena Gjokën, sot Apeli i GJKKO vendos për masën e sigurisë

Ish-kryeministri Sali Berisha refuzon që të paraqitet në SPAK për t’u njohur me masat e sigurisë ‘detyrim paraqitjeje’ dhe ‘ndalim i daljes jashtë shtetit’, në çështjen “Partizani” ku akuzohet për korrupsion pasiv. Ndërsa dje duhej të ishte përballë drejtësisë dhe të jepte llogari për këtë aferë, Berisha sërish përdori Kuvendin si mburojë, nga ku bashkë me mbështetësit e tij ka organizuar një skenar për të sabotuar punën. Dje, në një prononcim për media, ai tha se është urdhër i kryeministrit Edi Rama.“Unë jam paraqitur në Parlament. Jam paraqitur në Parlament nuk mund të pranojë kurrë përvetësimin që bën Rama”, tha ai. Sulme të ashpra pati edhe drejtësisë, ku prokurorin Arben Kraja dhe gjyqtaren Irena Gjoka, i cilësoi si mercenarë të Edi Ramës. Berisha tha se nuk do të paraqitet në SPAK. “Ai është një urdhër i Edi Ramës i lëshuar nëpërmjet mercenarëve të inkriminuar, siç është Arben Kraja, i cili qëndron në detyrë në shkelje të Kushtetutës dhe ligjit të prokurorisë, që e nxjerr jashtë si ish-oficer sigurimit. Ua tregova unë dokumentin, ajo që fshihet prapa krimit, Irena Gjoka, e cila fshihet prapa krimit, dhe së fundi njeriu me lidhjet më obskure me Taulant Ballën. Pra ata janë shërbëtorë të mjerë që zbatojnë urdhra të Edi Ramës dhe i marrin pushtetin Parlamentit”, tha Berisha. Ndërkohë, mbrojtësit e Berishës, kanë kërkuar në Apel, deklarimin e humbjes së fuqisë së masës së parë, pikërisht pasi sipas tyre, ajo nuk është zbatuar brenda 48 orëve sipas neneve 248 dhe 249 të Kodit të Procedurës Penale. Ishte një seancë maratonë. Në mesditë, trupi gjykues njoftoi pushimin e parë prej 10 minutash. Më pas, palët u kthyen në sallë, ku vijuan me parashtrimet e palëve deri rreth orës 13.30, kur u njoftua pushimi i dytë. Seanca rinisi me parashtrimet e avokatëve të Jamarbër Malltezit që kërkuan humbjen e fuqisë së masës arrest me burg të vendosur ndaj dhëndrit të ish kryeministrit Sali Berisha. Seanca përfundoi rreth orësh 16.00, ndwrsa u shtyu pwr sot. “Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtarja Iliriana Olldashi, sot më 20.11.2023, ora 09:00, lidhur me çështjen penale nr. 56 akti, datë 14.11.2023 regjistrimi, mbi ankimin e personave nën hetim S.B. dhe J.M., me objekt: “Ankim ndaj vendimit nr. 112, datë 20.10.2023 të Gjykatës së Posaçme të Shkallës së Parë për Korrupsionin dhe Krimin e Organizuar” që ka disponuar në lëndë të masave të sigurimit personal, pasi dëgjoi palët, i dha fund shqyrtimit gjyqësor po në datë 20.11.2023, ora 16:00, dhe urdhëroi shtyrjen e shpalljes së vendimit në datë 21.11.2023, ora 11:00”, njoftoi gjykata.  Masat ndaj tyre u vendosën në 20 tetor, ndërkohë që është zbatuar vetëm ajo për Jamarbër Malltezin dhe biznesmenin Fatmir Bektashi, pasi Sali Berisha nuk është paraqitur në SPAK sipas vendimit të gjykatës.

Gjokutaj: Berisha s’u paraqit sepse vendimi është anti-kushtetues

Ndërkohë, avokati i Sali Berishës, Genc Gjokutaj, dje në një prononcim për mediat, pas përfundimit të seancës tha se kanë paraqitur argumentet e se masat e sigurimit nuk qëndrojnë, por edhe në thelb çështja është një farsë. “Kemi që nga ora 9 kemi paraqitur gjithë argumentet që jo vetëm masat e sigurimit nuk qëndrojnë por edhe në thelb çështja është një farsë. Janë bërë shkelje kushtetuese në shkallë të Parë edhe Jamarbër Malltezi ishte vet prezent. Gjykata ishte në pamundësi për të dhënë vendimin. Seanca është shtyre për nesër në orën 11 për të shpallur vendimin. Të gjitha kërkesat që kemi bërë një shkallë të parë ja kemi kërkuar edhe gjykatës së Apelit për t’i konstatuar. Maltezi shpjegoi gjithë procedurën e privatizimit dhe gjithë atë normalitet të procedurës”, tha Gjokutaj. I pyetur se pse nuk është paraqitur Berisha sot në gjykatë, Gjokutaj tha se nuk paraqitet karshi një vendimi antikushtetuese. “Nuk e di pse nuk është paraqitur Berisha. Berisha nuk paraqitet karshi një vendimi antikushtetues. Është një vendim nominal i informuar nga ne mbi anti-kushtetutshmërinë”, tha Gjokutaj.

Fatmir Bektashi paraqitet në SPAK

Nga ana tjetër, ndërtuesi Fatmir Bektashi është paraqitur dje  në SPAK për masën ‘detyrim paraqitjeje’ dhe ‘ndalimi daljes jashtë shtetit’ në çështjen ‘Partizani’, ku akuzohet për korrupsion aktiv. Kjo është hera e dytë që Bektashi është paraqitur në SPAK për masën detyrim paraqitjeje, ndërsa në të dyja rastet ka refuzuar të flasë për mediat. Ndryshe nga Sali Berisha, i cili ka refuzuar që të paraqitet në SPAK, ndërtuesi Bektashi ka shkuar për të dytën herë. Bektashi akuzohet nga SPAK se ka bashkëpunuar me Jamarbër Malltezin në transferimin e fitimit prej 5.4 milionë euro nga ndërtimet në ish truallin e kompleksit Partizani.