Akuzat e Berishës ndaj Komisionit Hetimor të 25 prillit, reagon ashpër Bardhi: PD s’mund të jetë mburojë e ish-kryeministrit, e nxis të përgatisë një kërkesë për zbardhjen e ngjarjes në Elbasan

Deputeti i Partisë Demokratike Gazment Bardhi ka reaguar ashpër me anë të një postimi në rrjetin e tij social ‘Facebook’, ndaj ish-kryeministrit Sali Berisha.

Gazment Bardhi është shprehur se Berisha ka vijuar edhe gjatë ditës së sotme me gënjeshtrat lidhur me Komisionin Hetimor për masakrën zgjedhore të 25 prillit.

“Duke dashur ti jap një shans Sali Berishës që të tregojë se interesi i tij është zbardhja e ngjarjes së Elbasanit dhe jo marrja në mbrojtje e bandave të Elbasanit, një pjesë e të cilave janë sot pjesë e operacionit të SPAK, e nxis të përgatisë një kërkesë për ngritjen e një komisioni hetimor vetëm për atë çështje”, shkruan Bardhi.

Reagimi:

Sali Berisha ka vijuar edhe sot gënjeshtrat mbi komisionin hetimor për masakrën zgjedhore të 25 Prillit. Ngjarja e Elbasanit nuk ka qenë fare në objektin e punës së Komisionit. Më poshtë është vendimi për ngritjen e komisionit hetimor, ku qartësisht demontohet gënjeshtra e Sali Berishës.

Vendosja e shenjës së barazisë midis sakrificës dhe betejës së demokratëve të Elbasanit në zgjedhjet e 25 Prillit dhe veprimtarisë së bandave kriminale me në krye Taulant Ballën, është akti më i shëmtuar i një njeriu që ka humbur rrugën e arsyes dhe është verbuar nga urrejtja për këdo që nuk është në PD për tu bërë mburojë për hallet e Sali Berishës.

Megjithatë duke dashur ti jap një shans Sali Berishës që të tregojë se interesi i tij është zbardhja e ngjarjes së Elbasanit dhe jo marrja në mbrojtje e bandave të Elbasanit, një pjesë e të cilave janë sot pjesë e operacionit të SPAK, e nxis të përgatisë një kërkesë për ngritjen e një komisioni hetimor vetëm për atë çështje, të caktojë kryetarin dhe anëtarët e opozitës tek të cilët ai ka besim.

Unë do jem një nga firmëtarët për ngritjen e këtij komisioni hetimor dhe do i kërkoj secilit koleg të opozitës të firmos dhe mbështesë këtë Komision Hetimor.

Ripërsëris kërkesën që ta bëje gati dhe të ma sjell për firmë që sot (dorazi të lutem, jo me fax sepse lë gjurmë që të lenë pa gjumë pastaj)!