Alqi Bllako ‘zbërthehet’ në gjykatë, Klodiana Lala zbardh çfarë deklaroi ish-deputeti i PS-së dhe lëvizjen që po përgatit

Pak çaste më para ka përfunduar seanca në Apelin e GJKKO-së për ish-deputetin e PS-së, Alqi Bllako. Apeli vendosi të refuzojë kërkesën e Bllakos për lirimin nga burgu.

Ish-deputeti i PS Alqi Bllako ka folur në seancën e sotme, pasi kërkoi ndryshimin e masës së sigurisë.

Bllako tha para gjykatës se në procedurat e shpronësimit për tokën ku është ndërtuar inceneratori i Fierit nuk ka pasur asnjë rol, pasi në cilësinë e Sekretarit të Përgjithshëm të Ministrisë së Mjedisit vetëm ka përcjellë praktiken për shpronësim të hartuar nga komisioni i ngritur me urdhër te Ministrit.

Ai ka folur edhe mbi korrupsionin pasiv.

“Nuk kam asnjë rol më shpronësimin e tokës ku është ndërtuar inceneratori i Fierit”, ka thënë Bllako.

Ndërsa, në lidhje me akuzën e punësimit të babait të tij, ish-deputeti i PS a thënë se nuk ka qenë Sekretar në ministrinë e Mjedisit, por i punësuar në Presidencë.

“Në lidhje me punësimin e babait në inceneratorin e Tiranës, nuk kam qenë sekretar në Ministrinë e Mjedisit, por i punësuar në Presidencë”, ka thënë ai.

Gjatë seancës, avokati i ish-deputetit këmbënguli për një masë më të lehtë sigurie pasi Bllako nuk kishte mundësi të ndërhynte tek provat, por gjykatësja Ilirjana Olldashi e la atë nën masën e arrestit me burg.

Gjithashtu gazetarja Klodiana Lala ka zbuluar edhe lëvizjen e radhës që pritet të bëjë ish-deputeti i PS-së.

“Avokati i Bllakos teksa nuk doli sot në një prononcim për mediat, paralajmëroi se do t’i drejtohet me një rekurs Gjykatës së Lartë. Por kjo gjykatë ka rrëzuar më parë rekursin për ish ministrin Lefter Koka, ndaj ka pak gjasë që ky rekurs të pranohet.”, tha Lala.