Ambasada e SHBA në Tiranë mesazh për Ditën e Rinisë: Nderojmë guximin e studentëve dhe të rinjve që kërkuan demokraci për vendin e tyre

Ambasada amerikane në Tiranë ka uruar ditën e djeshme Ditën Kombëtare të Rinisë. Nëpërmjet një postimi në rrjetin social, ambasada shkruan se 32 vite më parë, studentët dhe të rinjtë shqiptarë u bënë protagonistë të momentit shumë të rëndësishëm në historinë e Shqipërisë, me rrëzimin e regjimit komunist. “Shqipëria shënon Ditën Kombëtare të Rinisë. Vetëm 32 vite më parë, studentët dhe të rinjtë shqiptarë protestuan kundër njërit prej regjimeve komuniste më mizore të Europës, duke nisur rënien e tij dhe duke u bërë protagonistë të një momenti shumë të rëndësishëm në historinë e Shqipërisë. Më 8 dhjetor, ne nderojmë guximin e atyre studentëve që kërkuan ndryshime politike dhe demokraci për vendin e tyre”, thuhet ndër të tjera në reagim. Gjithashtu ambasada e SHBA shprehet se Shqipëria po përgatitet të hedhë hapin tjetër të rrugëtimit demokratik drejt BE. “Të rinjtë sot vazhdojnë të formësojnë të ardhmen e vendit dhe Shtetet e Bashkuara qëndrojnë krah për krah me popullin shqiptar ndërsa ju hidhni hapin tjetër të rrugëtimit tuaj demokratik drejt anëtarësimit në Bashkimin Europian”, thuhet në postimin e bërë nga ambasada amerikan. Më 8 dhjetor 1990, një grup studentësh e pedagogësh të Universiteteve të Tiranës, u bënë iniciatorë e protagonistë të kthesës së madhe historike, protestave paqësore që sollën rënien e sistemit komunist dhe lindjen e demokracisë. Të organizuar ata marshuan nga ‘Qyteti Studenti’ drejt qendrës së Tiranës. Ata u bënë iniciatorë e kthesës së madhe historike të vendit, duke u ngritur në protesta që sollën rënien e sistemit komunist dhe ardhjen e demokracisë. Me shprehjen “E duam Shqipërinë si gjithë Europa”, të rinjtë kërkuan ngritjen e sistemit të vlerave perëndimore dhe të shtetit të së drejtës; integrimin në Europë dhe garantimin e pluralizmit politik si bazë kryesore për një shoqëri të lirë e demokratike. Lëvizja Studentore e vitit 1990 është e vetmja Lëvizje paqësore që ndryshoi historinë e Shqipërisë.