Arrestimi i agjentit të FBI, Berisha plas skandalin: Ish-agjenti Neza dhe ish-zv/ministri Duçka i dhanë 225 mijë USD nga Rama, biznesmeni përdor emailin e qeverisë

Ish-kryeministri Sali Berisha denoncoi se kryeministri Edi Rama i ka dorëzuar në rrugë të tretë ish-agjentit të arrestuar të FBI, 225 mijë dollarë nëpërmjet ish-agjentit të shërbimit sekret shqiptar, Agron Neza, që jeton në Nju Xhersi të SHBA dhe ish-zv/ministrit të Energjisë, Dorian Duçka, të cilët përmenden në dosjen hetimore të ish-agjentit të arrestuar të FBI, Charles McGonigal si “personi A” dhe “personi B”. Në një deklaratë për mediat, kreu i “Foltores” akuzoi Duçkën se është biznesmen mafioz që ka punuar prej 4 vitesh në një konglomerat kinez të energjisë, e cila po hetohet tashmë nga SHBA dhe Kina. Madje, Berisha shtoi se Rama dhe vëllai itij, Olsi Rama kanë flutuar me avionë privatë “charter” në Kinë, që siguroheshin nga Dorian Duçka. Jo vetëm kaq, por ish-kryeministri thelloi akuzat ndaj biznesmenit Duçka se ka akses në adresën zyrtare të Shqipërisë në komunikimet elektronike me e-mail. “Është zbuluar se Edi Rama, nëpërmjet Agron Nezës, i ka dorëzuar Charles McGonigal 225 mijë dollarë në një dorë. 80 mijë dollarë në një dorë tjetër, sipas medieve. McGonigal ka përfaqësuar një nga bosët e mafies ruse, Oleg Deripaska, i cili ose për të cilin ka lobuar te Edi Rama. Çfarë është Dorian Duçka? Është një mafioz i punësuar si drejtor për katër vite në një konglomerat energjetik kinez. Ju kujtohen avionët që merrnin Edi Ramën dhe Olsi Ramën që i çonin në Pekin? Ato i sillte drejtor Duçka. Kjo kompani është në hetim të thellë në Kinë dhe SHBA njëkohësisht. Dorian Duçka, sipas FBI, qëndron në paradhomën e kryeministrit. Ai përdor e-mailin dhe adresën qeveritare. Sipas hetimeve të FBI, përdor e-mail qeveritar të Shqipërisë dhe adresë të qeverisë së Shqipërisë”, deklaroi fillimisht Berisha.