Arrestimi i Dakos, Rama: S’është e lehtë por jemi krenarë që goditen njerëz të lidhur me pushtetin, duhet durim në luftën kundër korrupsionit

Kryeministri Edi Rama thotë se janë krenarë që për herë të parë në historinë e Shqipërisë ndodh që po goditen njerëz të lidhur me pushtetin. Ky reagim i Ramës u dje në Berat gjatë një takimi që pati me socialistët në kuadër të turit të falënderimit dhe duket se i referohet arrestimit të Vangjush Dakos me urdhër të SPAK, megjithëse nuk përmend emër. Kreu i qeverisë theksoi se duhet bërë durim në luftën kundër korrupsionit ndërsa u shpreh se nuk është e lehtë që të shohë njerëzit që i ka pasur në krah të jenë përballë prokurorit apo gjykatësit për shkelje të ndryshme. “Kemi hyrë në fazë të re. Duhet bërë durim edhe në luftën kundër korrupsionit. Për herë të parë në historinë e popullit tonë po goditen njerëz të lidhur me pushtetin. Kjo nuk është e lehtë. Kjo të bën të ndihesh jo mirë se s’ke si ndihesh mirë kur sheh që dikush që ka qenë përkrah teje, është përkrah avokatit përballë prokurorit apo gjykatësit. Me siguri diçka ka ndodhur. Edhe kur e sheh se si mund të përdoret forca e pushtetit të drejtësisë për të bërë edhe gjëra që nuk shkojnë. Të gjitha janë pjesë e një procesi dhe rruga është e përpjetë, jo dishezë. Kini parasysh që për herë të parë ndodh kjo. Për këtë duhet të jemi ne krenarë për PS”, deklaroi ai. Gjatë turit falënderues, Rama u ndal edhe te fitorja pas 14 majit, duke thënë se mund të fitojnë edhe 19 beteja të tjera elektorale nëse arrijnë të bëjnë reflektim. Vetëm kështu, sipas tij, PS-ja mund të vijojë të ketë fitore. “Na duhet të bëjmë realisht një reflektim shumë të madh pas kësaj fitoreje. Arsyeja pse kemi fituar dhe kemi fituar 8 nga 9 beteja elektorale dhe mund të fitojmë edhe 18 të tjera është sepse ne sapo kanë mbaruar një palë zgjedhje kemi filluar të mendojmë për një palë zgjedhje të tjera duke mos e konsideruar asnjë fitore një arsye për të fjetur mbi dafina dhe për të vazhduar përpara duke i parë tjerët nga lart poshtë”, nënvizoi Rama.