Arrestimi i ish-zyrtarit të FBI dhe lidhjet me Shqipërinë dhe Edi Ramën/ Zbardhen shkresat e dërguara SPAK, SHISH dhe Ministrisë së Brendshme

Deputeti i PD-së Ervin Salianji ka informuar sot se i ka dërguar shkresat me aktakuzën dhe lajmet e mediave ndërkombëtare për arrestimin e ish-zyrtarit të FBI-së Charles McGonigal SPAK, SHISH dhe Ministrisë së Brendshme, duke kërkuar hetimin e lidhjeve të tij me kryeministrin Edi Rama.

Nga Kryesia e Kuvendit, Salianji tha se ky vendim ka ardhur pasi nuk ka parë asnjë reagim nga institucionet shtetërore.

“Të gjitha mediat ndërkombëtare e kanë pasur në faqe të parë dhe lajm të parë Shqipërinë, si një vend i cili ka tentuar të korruptojë në këtë rast.Unë smund të bëj dot as prokurorin, as akuzatorin, por moralisht mendoj se nuk ka asnjë çështje më të rëndësishme. Nuk ka asnjë reagim nga institucionet shtetërore.Për këtë arsye sot si deputet i kam dërguar këto shkresa SPAK-ut, SHISH dhe Ministrisë së Brendshme, Policisë dhe Agjencisë së Inteligjencës së Min së Brendshme”, tha Salianji.

Ai tha se materialet e dala janë të mjaftueshme për të nisur hetimin duke i drejtuar më tej disa pyetjeve këtyre institucioneve.