Arrestimi i sekretares së përgjithshme të MSH, zbardhet përgjimi i SPAK, inxhinieri dorëzoi zarfin me para

Zbardhen episode nga përgjimet që çuan në pranga sekretaren e përgjithshme të Ministrisë së Shëndetësisë. Në fakt SPAK kishte në përgjim një numër personash lidhur me një çështje tjetër në Ministrinë e Shëndetësisë. Gjatë përgjimeve, u evidentua një telefonatë ku Vladimir Topi flet me Laura Shteton të cilës i thotë “do ti sjellë Silvi Direkt”. Më pas, biznesmeni flet me inxhinierin e kompanisë së tij Silvi Shehu të cilit i kërkon që ti dorëzojë 330 mijë lekë Laura Shtetos, specialiste në ministrinë e Shëndetësisë. Oficerët e BKH janë ngarkuar për ta ndjekur situatën në vijim me vëzhgime ambientale dhe përgjime ku ka rezultuar se Silvi Shehu është takuar tek rruga e Kavajës me Laura Shteton. Kjo e fundit ka marrë prej tij një zarf me të cilin ka hyrë në Ministrinë e Shëndetësisë dhe ka shkuar në zyrën e sekretares së përgjithshme Joana Duro. Në këtë moment, oficerët e BKH ndërhynë duke vënë në pranga dy zyrtaret dhe sekuestruan edhe shumën prej 330 mijë lekësh. Hetuesit po verifikojnë nëse punonjësja e ministrisë Laura Shteto ka pasur përfitim nga veprimet që ka kryer. Ngana tjetër Sekretarja e Përgjithshme e dikasterit Joana Duro ka mohuar akuzat pas arrestimit ndërsa në gjykatë është shprehur se nuk e dinte çfarë kishte në zarfin që specialistja Laura Shteto kishte dërguar në zyrën e saj. Sipas prokurorisë, aty u gjetën 330 mijë lekë të dhëna ryshfet për favorizimin e kompaninë  'DRICONS’ në tenderin për supervizimin për rikonstruksionin e qendrave shëndetësore në Tiranë dhe Durrës.