Atentati në Vlorë, Agalliu: Qyteti bregdetar, vend ku krimi i organizuar kryen vrasje në mes të ditës

Deputeti i Partisë  Demokratike, Arbi Agalliu ka reaguar për atentatin në Vlorë duke thënë se qyteti bregdetar është kthyer në një vend ku krimi i organizuar kryen ekzekutime në mes të ditës pa u shqetësuar nga asgjë. Ndër të tjera, ai thotë se Vlora i është dorëzuar krimit.“Vrasjet vazhdojnë!!! Dy të vdekur dhe një i plagosur është bilanci i atentatit në hyrje të Vlorës! Qyteti i Vlorës është kthyer prej vitesh në qytet ku krimi i organizuar dhe ai ordiner kryejnë vrasje e vjedhje në mes të ditës pa asnjë problem. Qyteti i Vlorës me dhjetra djem të zhdukur në këto vite i është dorëzuar aktivitetit kriminal", tha Agalliu. Ndërkohë, Endrit Braimllari nga 'Partia e Lirisë' shkruan se forcat blu nuk kanë më asnjë funksion tjetër veç numërimit të viktimave. “Siguria Kombëtare në rrezik. Vendi në pushtetin e krimit të organizuar. Rama dhe Rilindja vendosën qeverinë në funksion të krimit të organizuar. Rilindja bashkëpuntore me krimin e organizuar. Policia e shtetit jashtë funksionin është kthyer ne Polici statistikash ku për fatin e keq numëron viktimat. Ka vetëm një rrugë largimin e kësaj qeverie kriminale e cila po rrezikon çdo ditë jetën e qytetarëve", shkruan Braimllari. Geno (Shpati) Lena, 37-vjeç dhe Hakim Xhezo, 34 vjeç, janë ekzekutuar ditën e djeshme në mëngjes nga një atentat i mirëorganizuar në aksin Fier-Vlorë, në afërsi të mbikalimit të fshatit Panaja. Paraprakisht dyshohet se vrasja ka ndodhur për motive hasmërie. Brenda makinës së djegur janë gjetur 3 automatikë.