Banorët e Bërxullës sërish në protestë: Tokën do ta mbrojmë me gjak, askush s’ka ardhur të flasë me ne, qeveria favorizon oligarkët

Prej afro gati 5 muajsh, banorët e Bërxullës kanë protestuar për pronat e tyre private, por pa asnjë reagim. Ditën e sotme ata bllokuan rrugën e Rinasit, patën tensione me policinë, marshuan dhe denoncuan në prononcim për mediat, problemin që ata kanë me pronat e tyre.Prej dekadash autoktonë të banesave në Bërxullë, fshatarët e kësaj zone thonë se tokën, shteti mund t’ua marrë vetëm me gjak. Edhe gjatë protestës së tyre pak kohë më parë, nënë e bir kërcënuan se do të hidhen nga shtylla e tensionit të lartë. Në episode të tjera gjatë protestave por edhe dje, banorët janë shprehur se nuk ka pasur asnjë negociatë me ta nga ana e institucioneve dhe se kishin përgatitur dosjen gati për në Gjykatë.Një ndër banorët deklaroi dje për mediat se do ta mbrojnë me gjak pronën. “Këtu po vidhet tokat hapur fare. Do ta mbrojmë me gjak deri në fund të jetës. Nuk mund të vidhet e ardhmja e fëmijëve tanë për disa oligarkë hajdutë. Ne japim jetën dhe pronën nuk e lëshojmë”, deklaroi një banor. Kujtojmë se banorët e Bërxullës janë ngritur disa herë në protestë. Më herët ato thanë se nuk janë kundër projektit, por problematika sipas tyre është te vlera e tokës dhe banesës. Sipas banorëve, rrezikohen 20 banesa nga projekti dhe qeveria nuk ka një vendim për zhvendosjen e tyre.