Basha: Në shërbim të njerëzve, jo të atyre që kanë 30 vjet që përfitojnë

Lulzim Basha përmes një postimi në rrjetet sociale është shprehur se ka zhvilluar një takim me ata që i quajti “qëndrestarë të Partisë Demokratike”.

Basha shkroi në Facebook se zhvilloi një bisedë ku iu përgjigj pyetjeve pas një viti heshtje nga ana e tij dhe të mbushur me “shpifje e mashtrime nga ai që, për interesa personale dhe të familjes së tij, vendosi të godasë PD-në”, duke iu referuar Sali Berishës.

Sipas tij për të mbuluar dështimin dhe izolimin e tij, ish-kryeministri ka rinisur të njëjtat sulme, teksa shtoi se natën ndan favoret me oligarkët e përbashkët me Ramën, ndërsa ditën akuzon të tjerë.

Ai shtoi se ndryshe nga Berisha të cilin e quajti shkaktarin e kësaj situate në PD, ai bëri një hap pas për shkak se nuk donte luftë të brendshme, teksa vijoi më tej duke u shprehur se e ndjen detyrë përkushtimin e energjive te një opozitë në shërbim të njerëzve dhe jo interesave të një grupi që ka 30 vjet që përfiton prej saj.

Postimi i plotë:Në zemër të Tiranës, te Dega nr. 8, ndalova për një kafe me miq dhe qëndrestarë të Partisë Demokratike.
Zhvilluam një bisedë të hapur dhe të drejtpërdrejtë, ku i’u përgjigja pa asnjë hezitim pyetjeve, interesit dhe shqetësimeve të tyre të natyrshme pas një viti heshtje nga ana ime dhe të mbushur me shpifje e mashtrime nga ai që, për interesa personale dhe të familjes së tij, vendosi të godasë Partinë Demokratike.

Për të mbuluar dështimin dhe izolimin e tij, ka rinisur të njëjtat sulme, atë që bën ndaj kujtdo që nuk e kontrollon dot. Natën ndan favoret, lejet e ndërtimit, tenderat, përmes oligarkëve të përbashkët me Edi Ramën, ditën del dhe akuzon të tjerët.
Ndryshe nga ai që është shkaktari i kësaj situate në PD, pasi është shpallur non grata nga SHBA për korrupsion dhe minim të demokracisë, unë bëra një hap pas, sepse nuk doja një luftë të brendshme, i bindur se prej saj përfitojnë vetëm kundërshtarët! Por ja ku jemi.

Asgjë s’ka ndryshuar, madje situata është edhe më keq për demokratët dhe shqiptarët.
Prandaj e ndjej për detyrë t’i përkushtoj energjitë e mija tek një opozitë në shërbim të njerëzve dhe jo interesave të një grupi që ka 30 vjet që përfiton prej saj.

Demokratët sot janë më të qartë se kurrë, që nuk mund të fitojnë pa një aleancë me SHBA, Britaninë e Madhe dhe Bashkimin Europian, dhe se hallet personale nuk mund të kthehen në pengesë për demokratët dhe shqiptarët që duan ndryshimin.