Basha: PD mbështet SPAK në luftën kundër krimit dhe korrupsionit në nivele të larta, çdo përpjekje për ta intimiduar, e destinuar të dështojë

Kryetari i Partisë Demokratike, Lulzim Basha ka shprehur mbështetjen e tij ndaj SPAK në luftën kundër krimit të organizuar dhe korrupsionit në nivele të larta. Dje, përmes një reagimi në rrjete sociale Basha shkruan se çdo përpjekje e krimit të organizuar për të intimiduar SPAK është destinuar të dështojë. “Partia Demokratike mbështet fuqimisht dhe pa asnjë rezervë luftën kundër krimit të organizuar dhe korrupsionit në nivele të larta. Fundi i pandëshkueshmërisë është fillimi i ndryshimit të vërtetë për shqiptarët. Çdo përpjekje e krimit të organizuar me mbështetje apo syshkelje politike për të intimiduar apo shënjestruar SPAK është destinuar të dështojë. Kushdo që luan pisët me qëllim njollosjen e SPAK është i paralajmëruar: PD në krah të aleatëve strategjikë është në mbështetje të SPAK”, shkroi ai. Ndërkohë, kryetari i Partisë Demokratike Lulzim Basha ka vijuar dje turin e takimeve, ndërsa është ndalur në njësinë Administrative, Ndroq. Në kuadër të turit të tij në të gjithë Shqipërinë, Basha ka takuar banorët e kësaj zone rurale të Tiranës, për të folur për problemet që ata hasin. “Përshëndetje të gjithëve këtë mëngjes plot diell nga Ndroqi”, shkruan Basha në Facebook. Nga këto takime, Basha e ka dhënë dhe një mesazh për situatën në PD, duke thënë se do jenë të mirëpritur gjithmonë ata që duan një parti europiane në partneritet të ngushtë me aleatët tanë strategjik.“Kënaqësi të takohem me Xhelal Merepezën, një kontributor i palodhur i PD. Idetë dhe sugjerimet e tij janë shumë të vlefshme për ringritjen e modernizimin e PD. Në PD janë të mirëpritur të gjithë ata që duan një parti moderne europiane në partneritet të ngushtë me aleatët tanë strategjik. Kontributi i qëndrestarëve nuk do të harrohet por do të vlerësohet dhe nderohet gjithmonë”, shprehet Basha në rrjetet sociale.