Basha shpalos planin: Kufizim mandatit të kryeministrit dhe 22 vite burg për politikanët që blejnë vota, vetingu politik beteja jonë

Kreu i PD Lulzim Basha gjatë takimit me të rinjtë e FRPD-së ditën e djeshme, ka shpalosur planin e partisë së tij. Kryedemokrati Basha, theksoi nevojën e kufizimit të pushtetit në dy mandate për kryeministër. Ndër të tjera, ai u shpreh se rinia do t’i japë një politikë të re dhe me fytyrë njerëzore vendit. “Me premtime të pambajtura prej 31 vitesh me politikanë që u plakën dhe duan të vdesin në karriget e pushtetit, duke filluar nga ky që ka 6 vjet që thotë do ta lë politikën dhe çdo vit shpik truke dhe bën krime elektorale për të gllabëruar çdo pushtet. Sepse pushteti korrupton. SHBA u thotë jo më shumë se dy mandate, dhe këtë kam propozuar edhe unë. Vetëm vendosja e rregullave të tilla do na mundësojë të kalojmë nga fjalët te veprat dhe ne e kemi plan”, tha ai. Ndër të tjera, lideri demokrat Lulzim Basha kërkoi dënime me 22 vjet burg si në Itali në rast se kapen duke blerë vota në zgjedhje. Ai theksoi se kjo është një praktikë që është bërë edhe në Itali dhe tha se kërkohet ky dënim pasi nëse një politikan kapet duke vjedhur ka vrarë shpresën. “Pushteti absolut korrupton në mënyrë absolute, kufizimi i mandateve janë instrumente për ta pastruar politikën dhe për ta bërë atë më llogaridhënëse. Themeli janë zgjedhjet, është vota. Ndaj kemi propozuar që sanksionet për shkatërrimin e zgjedhjeve në Shqipëri të bëhen aq të forta sa në Itali. Nëse një politikan kapet duke blerë vota dënohet deri në 21 ose 22 vjet burg. Pse dënim kaq i rëndë sepse vret shpresën”, tha Basha. Ndërkohë, lideri demokrat Lulzim Basha kërkoi edhe veting për të korruptuarit në politikë. Ai tha se me vetingun e politikanëve, shumë politikanë do të ikin nga politika. “Ata që nuk bien dakord për asnjë gjë, për një gjë bien dakord, mos të lëshojnë karriget. Nuk bien dakord për asgjë, për një gjë bien dakord, mos të bëjmë veting të politikanëve. Pse? Sepse po u bë vetingu i politikanëve, e sigurt është që shumë karrige do të zbrazen. Dhe në ato karrige, duhet e do të vijnë politikanë të rinj, rinia shqiptare që do t’i dalë për zot vendit”, tha ai.