Ben Blushi: Mbetjet e shoqërisë Rilindja i bëri deputetë, ligji është i blerë dhe kriminal

Deputeti Ben Blushi ka kritikuar dje fortë rikthimin e ligjit për importin e mbetjeve. Ai nuk u bind nga argumentet e kolegëve të tij socialistë, që ishin angazhuar për të mbrojtur ligjin. Ai tha se ligji i mbetjeve është një ligj i blerë, ndërsa ashpërsoi fjalorin për deputetët që do e votojnë. Blushi tha se mbetjet e shoqërisë, Rama i bëri deputetë. “Mbetjet e shoqërisë, Rilindja i bëri deputetë. Sot, ata po votojnë për mbetjet. Çdo deputeti që voton sot këtë ligj, duhet t'i shkruhet emri në kazanin e plehrave të lagjes”, dekori Blushi, dje në Parlament. Ligjin, deputeti e vlerësoi kriminal. “Ky ligj për heqjen e kufijve për mbetjet që vinë nga Evropa është kriminal. Duke hequr kufijtë për helmet që do hynë në Shqipëri, ai do jetë përgjegjës direkt për shëndetin e rrezikuar të qindra mijëra shqiptarëve, toka, uji dhe ushqimet e të cilëve do të helmohen për shkak të rritjes së sasive të mbetjeve që shkakton ky ligj. Nëse duhet të them pse erdhi ky ligj ka paguar për ta sjellë në Parlament. Pa asnjë dyshim. Rilindja nuk e fsheh më se e ka shitur ligjin në tërësisht në Parlament, pasi ai u hoq në vitin 2013, natyrisht e kam një përgjigje: ky ligj është i blerë. Është krijuar me sa duket nën kujdesin e veçante të Partive Tregtare të Rilindjes edhe një treg i ri: tregu i ligjeve. Nëse ke para e blen një ligj, nëse nuk ke, e blen kundërshtari yt”, theksoi deputeti i Partisë Socialiste.

Në vijim, Blushi theksoi se çdo qeveri në Shqipëri është e kapur nga një grup biznesmenësh, që pavarësisht rotacioneve politike, sërish janë ata që vendosin për ligjet.“Prandaj pyetja mbetet prej shumë kohësh: Kush e qeveris Shqipërinë? E qeveris një grusht biznesmenësh, të cilët dje kishin kapur PD dhe sot kanë kapur Rilindjen. Pra, rotacioni i pushtetit nuk vlen më në Shqipëri. Shqiptarët votojnë dhe gjithmonë nga kutia e votimit del një grup biznesmenësh, pronë e të cilëve janë edhe dy partitë e mëdha, PD dhe Rilindja dhe, një pak më e vogël, e cila bën transportin e bizneseve nga njëra te tjetra. Mes dy brigjeve që i ndot i njëjti moçal, ka gjithmonë nevojë për një kazan lundrues”, shtoi Blushi.