Berisha, Basha dhe Prendi të kallëzuar në SPAK për “21 janarin”, Prokuroria Speciale: Do hedhim shortin për përcaktimin e prokurorit

Prokuroria e Posaçme për Korrupsionin dhe Krimin e Organizuar do të hedhë në short shqyrtimin e kallëzimit të ministrit të Drejtësisë, Ulsi Manja ndaj ish-kryeministrit Sali Berisha, ish-kreut të PD dhe ish-ministrit të Brendshëm, Lulzim Basha si dhe ish-komandantit të Gardës së Republikës, Ndrea Prendi për vrasjen e 4 qytetarëve në 21 janar 2011 përpara godinës së Kryeministrisë. Lajmi u dha nga Sekretaria e SPAK për median “Euroneës” pas pyetjes që iu bë lidhur me procedimin e këtij kallëzimi. Megjithatë, nuk është përcaktuar ende data e hedhjes së shortit për përcaktimin e prokurorit të SPAK që do të shqyrtojë këtë kallëzim penal. “Në Sekretarinë e Prokurorisë së Posaçme kundër Korrupsionit dhe Krimit të Organizuar është protokolluar në datën 23.01.2023, kallëzimi i Ministrit të Drejtësisë, z. Ulsi Manja, në lidhje me ngjarjet e dates 21.01.2011. Ky kallëzim do t’i nënshtrohet procedurës së shortit dhe do të trajtohet në përputhje me parashikimet e Kodit të Procedurës Penale”, përgjigjet SPAK. Para dy ditësh, ministri Manja kallëzoi penalisht Berishën, Bashën dhe Prendin për veprat penale “Vrasje në rrethana të tjera cilësuese” dhe “Shpërdorim i detyrës”, duke i akuzuar për organizimin të sulmit me armë zjarri ndaj demonstruesve në 21 janar 2011. Manja deklaroi për mediat se vrasjet e 4 “Dëshmorëve të Atdheut” Hekuran Dedës, Faik Myrtajt, Ziver Veizit dhe Aleks Nikës se nuk janë vrasje nga pakujdesia, siç i cilëson Berisha dhe Gjykata e Apelit të Tiranës në 2013 ndaj Prendit dhe ish-gardistit Agim Llupo (u dënuan me nga 1 dhe 3 vite burg), por janë vrasje të pastra shtetërore. Këto veprime vijnë pasi gazetari Artan Hoxha dorëzoi në SPAK kasetën e komunikimeve në radio mes Prendit dhe vartësve të tij në 21 janar 2011, ku i udhëzonte për të qëlluar ndaj demonstruesve.