Berisha bën thirrje për revolta në Shqipëri, sulmon biznesmenët dhe ambasadoren Kim, i dërgon ultimatum të fortë presidentit Biden

Ish-Kryeministri Sali Berisha u ka kërkuar dje biznesmenëve që janë pjesë e bordeve të çmimeve të ngritura nga qeveria për krizën globale, që të tërhiqen. Në një konferencë shtypi me gazetarët, Berisha iu drejtua atyre se prania në këto borde është e jashtëligjshme dhe për të mbajtur çmimet nën kontroll duhet vetëm indeksimi i tyre. Berisha i cilësoi ata si të korruptuar nga Kryeministri Edi Rama dhe paralajmëron se do të përballen me ligjin. “Thirrje për të gjithë anëtarët e bordeve, largohuni nga bordet. Braktisni bordet sepse po merrni një rol të shëmtuar të mbrojtjes së një qeveria që vetëm vjedh. Unë ju garantoj ju se qëndrimi juaj në këto borde do t’u skalisë me të zeza në memorien e këtij vendi dhe këtij kombi. Çfarë biznesmenësh jeni ju që pranoni në kundërshtim me të gjitha rregullat e tregut në interes të një qeverie dhe një njeriu që vjedh nga mëngjesi në darkë t’u caktoni shqiptarëve çmimet ju? Nga buron kjo fuqi? Kush ja u dha juve këtë”, deklaroi ai. Më tej ish-kryeministri Sali Berisha u bëri thirrje qytetarëve që të ngrihen kundër regjimit të Ramës. “U bëj thirrje shqiptarëve që të ngrihen në lartësinë e njerëzisë së tyre, idealeve të tyre dhe të gatshëm për reagimet e nevojshme në mënyrë që të marrë përgjigjen e duhur Edi Rama”, u shpreh ai. Ndërkohë Berisha, komentoi në konferencën për shtyp edhe deklaratat e ambasadores amerikane në Tiranë, Yuri Kim. Ai tha, se ajo është duke bërë fushatë kundër tij.“Fushatë elektorale kundër Sali Berishës në prag të garës për kreun e PD-së. Unë i bëj thirrje qeverisë së SHBA dhe presidentit Biden që të mos lejojë përfaqësuesit e tij të ndërhyjnë në punët e brendshme të PD-së, veçanërisht në përpjekjet e tij për të përcaktuar kryetarin e partisë konservatore shqiptare,” tha Berisha.