Berishës i erdhi dita, arrestimet e fundit detyrojnë “non gratën” të mbajë aktivitete politike për të treguar se është pjesë e lojës

Me rregull matematikor, prangat duket se po trokasin tek familja e ish-kryeministrit Sali Berisha. Pas arrestimeve në radhët e Partisë Socialiste, radha do të kalojë nga opozita. Shtetet e Bashkuara të Amerikës i kanë vënë kusht të fortë drejtuesit të SPAK, Altin Dumani që të mbyllë me urgjencë dosjet përvëluese të tij, të cilat janë plotësuar me materiale shtesë nga SHBA. Terrori i kërcitjeve të prangave brenda selisë rozë ka detyruar Sali Berishën të mbajë aktivitete për të treguar forcën tek SPAK që ai ka mbështetje në politikë. Duket se Berishën e presin telashe edhe më të mëdha se non grata. Ajo që bie në sy janë sulmet e tij ndaj Prokurorisë së Posaçme. Në çdo dalje televizive, apo dhe takim, Berisha e etiketon SPAK-un si zyrë të PS. Halli i Berishës janë prangat. Ai duket se po e ndien se rrethi po ngushtohet. Gjatë 32 viteve demokraci, në Shqipëri kanë ndodhur me dhjetëra masakra, vrasje dhe skandale që edhe sot janë pa autor. Që nga vjedhja me skemat piramidale, grushti i shtetit më 1998, vjedhja e floririt në Krrabë, vrasja e Azem Hajdarit, zhdukja e Remzi Hoxhës, shfarosja e fisit Haklaj në Tropojë, 21 Janari, Gërdeci, vjedhja e Rrugës Durrës-Kukës, videoja Meta-Prifti, skandali i CEZ-DIA, afera e ish-kompleksit Partizani, e shumë ngjarje të tjera kanë kaluar në heshtje dhe askush nuk ka mbajtur përgjegjësi. Por ditët e fundit po jepen sinjale se mund të gjendet drita e zbardhjes për këto. Si për koincidencë, në të gjitha ngjarjet e përmendura më lart, protagonist i drejtpërdrejtë apo indirekt ka qenë Sali Berisha. Vendimi i Departamentit të Shtetit për ta shpallur të padëshiruar ka rritur rrezikun ndaj Berishës nga drejtësia e re. Deri më tani, ai ka qenë i paprekshëm pasi çdo çështje kundër tij është mbyllur. Por situata ka ndryshuar pas vendimit të DASH dhe presioni ndaj drejtësisë është rritur ndjeshëm. Nëse shohim të gjithë zyrtarët e lartë në vend, Berisha është personi që ka më shumë kallëzime. Edhe pse ai është shprehur nëpër media se kurrë s’ka pasur akuza ndaj tij për korrupsion, në SPAK momentalisht kemi dosje që nëse hetohen si duhen, lëkundin pozitat e ish-kryeministrit. Pra Berisha është në ditët e fundit të “Pompeit”. Të gjithë e dinë për shpërthimin e Vezuvit i cili zhduku plotësisht të gjithë qytetin. Të njëjtin fat mesa duket do të pësojë dhe ish-kryeministri demokrat.