Brukseli nuk tërhiqet, ja si do shkohet tek arrestimi i deputetëve, ministrave e ish-ministrave në Shqipëri, zbardhet raporti i BE

Brukseli kërkon që të nisin arrestimet “VIP”. Vetë BE është vendosur në lëvizje për të futur në shina drejtësinë shqiptare. Alarmi ka ardhur nga një raport i fundit nga Brukseli që tregon se shumica e vendeve të Ballkanit Perëndimor janë "shumë larg anëtarësimit në BE për sa i përket qeverisjes së tyre, sundimit të ligjit dhe standardeve demokratike", thotë raporti, duke analizuar se reformat kanë ngecur për shkak të kapjes së shtetit, korrupsionit, zhvillimit ekonomik të vonuar dhe mungesës së një perspektivë e besueshme për t'u bashkuar me Unionin në të ardhmen e parashikueshme. Raporti është i 11-ti në serinë e Miqve të Evropës mbi çështjet evropiane të sigurisë dhe mbrojtjes, të cilin gazeta “SOT” e disponon të gjithin.

Ja si do arrestohen “VIP”-at e korrupsionit

Një anëtar i lartë në grupin e ekspertëve me bazë në Bruksel është shprehur tek raporti se Bashkimi Evropian duhet të përshpejtojë integrimin e Ballkanit Perëndimor për të parandaluar Rusinë dhe fuqitë e tjera armiqësore që shfrytëzojnë paqëndrueshmërinë në rajon për të minuar Perëndimin. Raporti nga Brukseli, i bazuar në 40 intervista me ministra dhe zyrtarë të qeverive, Bashkimit Evropian dhe NATO-s, organizatave ndërkombëtare, ushtrisë, Parlamentit Evropian, diplomacisë, universiteteve, grupeve të ekspertëve dhe shoqërisë civile në Evropë dhe Shtetet e Bashkuara, vë alarmin tek korrupsioni i lartë në Ballkan. Në mënyrë që Ballkani Perëndimor të integrohet në BE duhet të çojë pas hekurave “VIP”-at e korrupsionit. Pra në këtë mënyrë Shqipëria është vendosur me shpatulla pas muri. Brukseli ia bën të qartë dhe Shqipërisë duke kujtuar përvojën e BE-së me vende si Rumania, Bullgaria, Kroacia. Kjo ndërhyrje bëri që të ndryshonte strategjia e zgjerimit sa i përket renditjes së kapitujve negociues, pra, të fillohej me kapituj 23 dhe 24 që kanë të bëjnë me sundimin e ligjit dhe luftën kundër krimit dhe korrupsionit. Në qoftë se vendet anëtare nuk tregojnë progres në lidhje me këta kapituj, atëherë nuk mund të hapen kapitujt e rinj, madje procesi i negociatave mund të ndalet plotësisht. Pra, drejtësia e re shqiptare e mbështetur nga ndërkombëtarët nuk do të ketë rrugë tjetër, vetëm të arrestojë deputetë, ministra dhe ish-ministra të korruptuar në vendin tonë.

Alarmi nga BE

Gjithashtu në raport thuhet se pavarësisht zhgënjimit në të gjithë rajonin me ritmin e progresit të kërmillit që kur BE-ja u dha për herë të parë një perspektivë anëtarësimi në 2003, anëtarësimi në BE mbetet rezultati më i mirë i imagjinueshëm për Shqipërinë, Bosnjën dhe Hercegovinën, Kosovën, Malin e Zi, Maqedoninë e Veriut dhe Serbinë dhe për pjesën tjetër të Evropës. BE-ja ende gëzon mbështetje të fortë publike pothuajse kudo, përveç Serbisë. “Udhëheqësit e BE-së dhe Komisioni Evropian duhet të shfrytëzojnë këtë moment gjeopolitik për ta bërë të besueshme perspektivën e zgjerimit për të gjitha vendet e Ballkanit Perëndimor. Ata gjithashtu duhet të kundërshtojnë përshtypjen se dhënia e statusit të kandidatit për Ukrainën dhe Moldavinë erdhi në kurriz të tyre. Nëse zgjerimi i BE-së dështon, alternativat mund të jenë përafrimi më i ngushtë me Rusinë dhe Kinën, shfaqja e një zone joliberale të paangazhuar që shtrihet nga Hungaria në Turqi, ose një zbritje në konflikte të reja të armatosura që përfshijnë një përzierje toksike të krimit të organizuar dhe migrimit të armatosur. Gjithçka do të ishte e mbushur me rrezik për BE-në dhe NATO-n”, thotë Taylor.