Deklarata e Krichbaum, Bardhi shpërthen ndaj Berishës: Po e fut PD në një rrugë pa krye, po e izolon ndërkombtarisht

Gazment Bardhi i është përgjigjur ditën e djeshme Sali Berishës, pas deklaratave të këtij të fundit ndaj deputetit të CDU-së se nuk duhet të ndërhyjë në zgjedhjet e brendshme të Partisë Demokratike. Bardhi e bën të qartë se Berisha duhet të heqë dorë tashmë nga pengmarrja e PD-së për interesat e tij, pasi po rrezikon që ta shpallë partinë “non grata” në PPE. “Sali Berisha duhet të dëgjojë apelin e partnerëve ndërkombëtar dhe të ndal pengmarrjen e PD për interesa të tij. Pas qëndrimit të qartë të SHBA, tashmë edhe partnerët Europian po flasin për rrezikun e izolimit të PD nëse Sali Berisha vijon me projektin për marrjen peng të PD. Parlamenti Europian në Raportin për Shqipërinë për vitin 2021 (pika 41) ka mbështetur sanksionet e SHBA për personat e shpallur “non grata” për korrupsion madhor dhe i ka bërë thirrje BE-së që të vlerësojë tërësisht një përafrim të mundshëm me veprime të tilla”, shkruan Gazment Bardhi përmes një postimi në rrjetet sociale. Përmes një shënimi në Tëitter, Bardhi shkruan se Berisha nuk mund të bëjë sikur nuk i dëgjon thirrjet e partnerëve ndërkombëtar dhe të vazhdojë me izolimin e Partisë Demokratike dhe po e fut këtë të fundit në një rrugë pa krye. “Ndërkohë Gunther Krichbaum deputet i CDU/CSU në Bundestag, dhe një mik dhe zë mbështetës i PD për shumë vite, ka bërë të qartë se: nëse PD dëshiron të bashkëpunojë në nivel ndërkombëtar, por edhe të marrë në dorë drejtimin e vendit, duhet të mos kthehet tek e shkuara. Sali Berisha nuk mund të fshihet dhe të bëjë sikur nuk dëgjon dhe nuk kupton. Ky është momenti që të mos bëjë sikur nuk kupton se po e fut Partinë Demokratike në një rrugë pa krye, duke e izoluar ndërkombëtarisht dhe duke çimentuar në këtë mënyrë regjimin e Edi Ramës”, i përgjigjet Gazment Bardhi ish-kryeministrit Sali Berisha për akuzat e tij ndaj deputetit të CDU.