Demokratët të vendosur në dy sheshe/ Çfarë skenari do të ketë nesër para Kryeministrisë? Berisha tregon detajet: Protestë gjigande. Të gjithë opsionet janë të mundshme. Zbardhet axhenda

Kryetari i Partisë Demokratike, Sali Berisha nuk dha detaje të skenarit që është përgatitur për protestën e ditës së nesërme, por tha se ajo do të jetë masive.

 

Në një deklaratë për mediat në përfundim të takimit me shoqërinë civile një ditë para protestës, ai u shpreh se të gjitha opsionet janë të mundshme.

Sa është numri që prisni nesër në protestë?

Përshëndes autorët e himnit të protestës së 7 korrikut Renis Gjokën dhe Big Bastën që me pasion dhe kreativitet i dhanë protestës barrakudën e saj.

Cfarë skenarësh ka për protestën nesër?

Kam një numër që do të jetë një protestë gjigande, masive. Skenarët e protestës janë të qarta, është betejë për lirinë dhe kundër padrejtësive me të cilat përballen këta qytetarë.

Do të udhëhiqni, apo do të udhëhiqeni?

Të gjitha opsionet janë të mundshme, edhe të udhëheq edhe të më udhëheqin.

Burime bëjnë me dije se ish-kryeministri Sali Berisha do të marshojë rreth orën 19:00 nga selia blu në drejtim të kryeministrisë, ndërsa të gjitha degët e PD në rrethe do të jenë të grumbulluara fillimisht në dy sheshet kryesore, pra në sheshin ‘Skënderbej’ dhe atë ‘Nënë Tereza’, për të marshuar në bulevard drejt kryeministrisë, së bashku me liderin demokrat.

Po ashtu si pjesë e axhendës është planifikuar që protesta të mund të hapet nga Altin Goxhaj, si kryetar i Frontit për Shpëtimin e Shqipërisë. Kjo protestë do të ketë një listë të gjatë folësish nga të gjitha shtresat e popullsisë, duke kulmuar me fjalën e ish-kryeministrit Sali Berisha.

Lideri demokrat është shprehur se kjo nuk do të jetë protesta e fundit, teksa ka paralajmëruar për këtë edhe kryeministrin Edi Rama me tone të larta, teksa protesta do të jetë si njësi matëse e reagimit dhe përgjigjes qytetare ndaj thirrjes së kryedemokratit.