Denoncimi i PD, ISHP përgjigjet: Krahasim absurd, testet serologjike dhe analiza PCR janë 2 gjëra të ndryshme

Instituti i Shëndetit Publik ka reaguar dje dhe i është përgjigjur Partisë Demokratike, sa i takon denoncimit që kjo e fundit ka bërë për testimet serologjike. Instituti i Shëndetit Publik i ka kujtuar PD se, analiza PCR dhe testet serologjike nuk janë e njëjta gjë, e për pasojë edhe rezultati nuk mund të jetë i njëjtë. Ditën e djeshme ish-deputeti Bardh Spahia, ka denoncuar sërish një rast ku një person që ka bërë testin në privat i rezulton ndryshe dhe në shtet ndryshe. Sipas ISHP krahasimi i PD është absurd. “Në vijim të deklaratave të bëra nga një ish-deputet i Partisë Demokratike, dhe të ndara më pas në faqen e kësaj partie, Instituti i Shëndetit Publik siguron qytetarët shqiptarë, se laboratorët tanë të kryerjes së analizave PCR, janë të standardeve më të larta të cilësisë dhe sigurisë. Cilësia e punës së specialistëve të ISHP dhe testeve të përdorura në rastin e COVID-19, janë të certifikuara! Kitet dhe reagentët e përdorura nga ISHP janë të standardeve ndërkombëtare, prodhuar nga kompani lider në sistemet dhe reagentët bioteknologjike, të ekstraktimit dhe amplifikimit të acideve nukleike. Me këto kompani punojnë të gjitha vendet e BE-së. Epidemiologët tanë të terrenit dhe ekspertët e shëndetit publik, si dhe ata të laboratorit të ISHP, kanë bërë dhe vazhdojnë të bëjnë një punë të palodhur dhe shembullore, që nga dita e parë e pandemisë”, thuhet në reagimin e ISHP. Më tej në njoftimin e ISHP, thuhet se pas denoncimit të PD fshihen përpjeke për të bërë politikë më pandeminë. Sakaq ISHP ka theksuar se në të dyja rastet, edhe testi i PCR, kitet dhe reagentët janë të certifikuara. “ISHP e konsideron krahasimin absurd mes analizës PCR dhe testeve serologjike, një përpjekje dashakeqe për të bërë politikë me pandeminë. Padituria në dallimin mes testit PCR, dhe analizave serologjike, të cilat nuk bëjnë diagnostikim dhe saktësia e të cilave ende po vlerësohet kudo në botë nuk duhet të shërbejë për të çoroditur qytetarët. ISHP hedh poshtë çdo aludim mbi punën e kualifikuar të institucionit, dhe u kujton qytetarëve se Laboratori ynë i Virologjisë është pjesë e Rrjetit Ndërkombëtar, që siguron edhe kontrollin e cilësisë së tij. Instituti i Shëndetit Publik u bën thirrje qytetarëve që t’u referohen vetëm burimeve zyrtare të informacionit, kur duan të informohen në lidhje me ecurinë e pandemisë në vendin tonë”, njofton ISHP.