Deputetët demokratë mesazhe urimi në ditën e Pavarësisë, e cilësojnë si një ditë bashkimi për shqiptarët, kërkojnë të bëhet më shumë për vendin

Mesazhe urimi në ditën e Pavarësisë së vendit kanë ardhur edhe nga deputetët demokratë. Deputetja e Partisë Demokratike Jorida Tabaku, ka uruar gjithë shqiptarët në këtë ditë feste. Me anë të një postimi në rrjetet sociale, ajo u shpreh se kjo është festa e cila bashkon shqiptarët dhe se duhet të jetë një ditë përkujtimi për të punuar më shumë për të ndërtuar këtë vend. “Shqiptarëve dhe shqiptarisë gëzuar festën e Flamurit. 28 Nëntori, është festa përbashkuese e kombit tonë, të shqiptarëve kudo që ndodhen dhe një ditë përkujtimi për përpjekjen e pareshtur për të ndërtuar një shtëpi për kombin tonë”, shkruan ajo. Edhe deputetja e Partisë Demokratike Grida Duma ka uruar Pavarësinë e Shqipërisë duke dhënë dhe një mesazh për atë që përcakton misionin dhe detyrën e shqiptarëve. Ajo shkruan, se atdheu shënjohet në ADN-në dhe na përcakton çfarë dhe kush jemi. Sipas saj, pavarësimi i çdo shqiptari nga varfëria është detyra e çdo politikani në këtë vend.“Gëzuar Pavarësinë e Shqipërisë! Atdhetarë të ndritur, mendimtarë shqiptarë, shqiptarët jashtë e brenda vendit; janë ndarë në shumëçka por janë bashkuar për shqiptarizmin! Sot duhet festuar dhe duhet kuptuar! Atë që na lanë e na trashëguan më të ndriturit e kombit, që sakrifikuan jetën për ta drejtuar anijen e historisë së Shqipërisë me velën drejt perëndimit, lanë amanetin ta prosperojmë më tej. Të gjithë kemi një detyrë ndaj atdheut, të vegjël a të mëdhenj, atdheu shënjohet në ADN-në tonë. Na përcakton “çfarë” e “kush” jemi. Pavarësia e vendit ishte nisja, mbërritja është liria e mendësisë së shqiptarit. Ka vargonj pushtuesish, ka vargonj nevojash. Shqiptarët sot varen ende nga vargonjtë e varfërisë. Pavarësimi i çdo shqiptari nga varfëria, edhe shqiptarit në periferinë më të largët, është detyra jonë”, shkruan Grida Duma.